Оқибатҳои ҳодисаҳои табиӣ дар шабонарӯзи гузашта дар навоҳии Дарвоз, Ванҷ ва Рӯшон

Душанбе, 21.07.2015. (АМИТ «Ховар», Лайло Тоирӣ).- Дар натиҷаи фаромадани сел дар ҷамоати Убағи деҳаи Висхарви ноҳияи Дарвоз  2 мошини сабукрав, дар деҳаи Курговад 1 кӯпруки мошингард таги сел монданд.
Дар ҷамоати Ҷовидони деҳаи Рави ноҳияи Ванҷ 1 мошини тамғаи «Старекс» бо 5 нафар мусофир таги сел монда, мусофиронаш дар ҷои ҳодиса ба ҳалокат расидаанд.
Дар деҳаи Лугади ҷамоати Вотхуди ҳамин ноҳия 1  адад «Экскаватор», 1 мошини тамғаи «Кетчут» таги сел монда, ронандаи «Экскаватор» бе ному нишон гум шудааст.
Дар деҳаи Бравни ҷамоати Вотхуд 1 мошини субукрави тамғаи «Опел», 1 мағозаи тиҷоратӣ таги сел мондааст.
Дар маркази ноҳияи Ванҷ оби канал аз маҷро баромада, идораи байтории ноҳияро хароб кардааст.
Ҳамин тариқ, сел 100 метр роҳи мошингарди шоҳроҳи Душанбе-Хоруғро дар мавзеи ҷамоати Барӯшони ноҳияи Рӯшон маҳкам намуда, 4 хонаи истиқоматиро хароб намудааст.
Дар натиҷаи фаромадани сел дар мавзеи деҳаи Деҳмиёни ҷамоати Вер 14 метр роҳи мошингарди шоҳроҳи Хоруғ-Мурғоб шуста шудааст.
Барои бартараф намудани оқибатҳои офати табиӣ аз ҷониби масъулин корҳои барқарорсозӣ ба роҳ монда шудаанд. 
Дар ин бора аз Вазорати корҳои дохилии Ҷумҳурии Тоҷикистон хабар доданд.