Парвандаи ҷиноӣ барои бо фиреб рӯёнидани 26 000 $ ИМА

Душанбе, 02.07.2015. (АМИТ «Ховар», Лайло Тоирӣ).-Нисбат ба роҳбари  ҶДММ “Союз Сохтмон”, марди 51-сола, ки бо роҳи фиреб аз  сокини   24-солаи кӯчаи Айнии пойтахт 26 000 доллари амрикоӣ гирифта, ваъда додааст дар ҳудуди маҳаллаи 83 аз бинои баландошёнаи навсохт  ба ӯ хонаи истиқоматӣ медиҳад, парвандаи ҷиноӣ боз шудааст. 
     1 июли соли равон ҷабрдида  ба ШВКД-1 дар ноҳияи Сино барои ҳалли ин масъала муроҷиат кардааст. Бино ба иттилои хадамоти матбуоти ВКД, роҳбари  ҶДММ «Союз Сохтмон» пештар  бо моддаҳои 247 ва 253 Кодекси ҷиноятии Ҷумҳурии Тоҷикистон суд шудааст 
Аз ҷумла, гумонбаршуда моҳи июли соли 2014 бо роҳи фиреб ба боварии зани 47-сола даромада, 20 000 доллари амрикоӣ ва  моҳи декабри соли 2013 бо ҳамин роҳ аз сокини 44-солаи пойтахт 48 000 -доллари амрикоӣ гирифта,  то ҳол ваъдаҳояшро иҷро накардааст.