Роҳхат ба Бозиҳои олимпии Бразилия-2016-ҳадафи асосӣ

Хуҷанд, 16.07.2015. (АМИТ «Ховар», Тоҳирҷон  Искандарзода ).-Аз  оғози моҳи июл инҷониб гўштингирони номвари тоҷик,  ҷоизадорони чемпионатҳои ҷаҳон,  Осиё ва дигар мусобиқаҳои байналхалқӣ  Комроншоҳи Устопириён, Илҳом Ҳофиззода, Хуршед Маҷидов таҳти роҳбарии Устоди варзиш, Мураббии шоистаи Федератсияи Руссия, мураббияи калон оид ба гўштини тарзи дзюдои Донишгоҳи ВКД ФР Елчанинов Владимир Николаевич тамрин доранд. Омодагии варзишгарони тоҷик дар толори варзишии намудҳои гўштини «Устопириён», воқеъ дар шаҳри Хуҷанд гузашта истодааст.  Минбаъд тамрини варзишгарони тоҷик дар толори варзишии «Шоҳин»- и лаби Баҳри тоҷик идома ёфта, ба он дигар гўштингирони шинохта- Саидҷалол Саидов ва Муҳаммад Абдураҳмонов ҳамроҳ мешаванд.  Устоди варзиш Елчанинов Владимир гўштингирони тоҷикро ба мусобиқаҳои бонуфузе, ки  охири моҳи июл ва то  анҷоми соли равон доир мешаванд, аз қабили Чемпионати ҷаҳон дар Сараево,  Ҷоми кушоди Осиё дар давлати Тайван,  Гран-При дар шаҳри Остонаи Қазоқистон ва чанде дигар омода карда истодааст. Тавре ки  Владимир Елчанинов гуфт, иштироки гўштингирони тоҷик дар ин мусобиқаҳо имконияти онҳоро барои ба даст овардани  роҳхати Бозиҳои олимпии Бразилия-2016  беҳтар месозад.