Роҳи Хоруғ-Мурғоб ҳарчи зудтар бояд барқарор шавад

Душанбе, 20.07.2015. (АМИТ «Ховар»). – Дар ин бора муовини сардори Муассисаи давлатии идораи хоҷагии роҳҳои ВМКБ Хушназар Абдураҳимов дар суҳбат бо мухбири АМИТ «Ховар» изҳор дошта, афзуд, ки бо супориши қатъии Сарвари давлат Эмомалӣ барои ҳарчӣ зудтар барқарор намудани ин роҳ айни ҳол дар ин мавзеъ аз ду самт 13 адад техника кор карда истодааст. 
Корҳо дар ин қитъаи роҳ бо ҷалби мутахассисони ватанию хориҷӣ бо суръат идома дошта, талош мешавад, ки ҳарчи зудтар роҳ бо сифати баланд мавриди истифода қарор дода шавад. 
Х. Абдураҳимов афзуд, ки ҳоло барои интиқоли бор ва рафту омади мошинҳои боркаш тавассути ноҳияи Ишкошим роҳи алтернативӣ фаъол шудааст.  
Ёдовар мешавем, ки бар асари чандин маротиба фаромадани ҳаҷми калони сел ва банд намудани маҷрои дарёи «Ғунд» 16-17 июл дар Вилояти Мухтори Куҳистони Бадахшон 2,5 километр роҳи мошингарди аҳамияти байналмилалидоштаи Хоруғ-Мурғоб хароб гардида буд.