«Россотрудничество» ҷуғрофиёи фаъолияташро дар Тоҷикистон фарох гардонданист

Душанбе, 24.23.07.2015.(АМИТ «Ховар», Марзия Саидзода).- «Россотрудничество»-и Русия тасмим дорад, ки ҷуғрофиёи фаъолияташро дар минтақаҳои  мухталифи Тоҷикистон фарох гардонида, тавсеа бахшад. Масъалаи мазкур зимни мулоқоти Сайдулло Хайруллоев -раиси Раёсати Ҷамъияти дӯстӣ ва равобити фарҳангии Тоҷикистон бо кишварҳои хориҷӣ (ҶДРФТ) бо хонум Любов Глебова -раиси президиуми ташкилоти «Россотрудничество»-и Русия дар Душанбе матраҳ гардид. Ҷонибҳо ба тавсеаи фаъолияти «Россотрудничество»-и Русия дар вилоятҳои Суғду Хатлон ва Бадахшони Тоҷикистон мароқ зоҳир намуда, изҳор доштанд, ки бо таваҷҷуҳ ба он, ки дар ин минтақаҳои Тоҷикистон шумораи зиёди русзабонҳо кору зиндагӣ мекунанд, ифтитоҳ намудани намояндагии «Россотрудничество» дар ин минтақаҳо ба манфиати кор хоҳад буд.
   Дар мулоқот масъалаи таҳкими ҳамкории байни ҶДРФТ ва  «Россотрудничество»-баррасӣ шуд. 
    С. Хайруллоев ба Л. Глебова доир ба фаъолияти ҶДРФТ ва анҷуманҳои он маълумот дода, нақши Анҷумани дӯстии «Тоҷикистон — Русия» ва «Россотрудничество»-ро дар таҳкими робитаҳои фарҳангии ду кишвари дӯст муҳим арзёбӣ кард. Таъкид шуд, ки имконоти Тоҷикистон ва Русия ҷиҳати тақвияти ҳамкорӣ дар заминаҳои илму фарҳанг ва маориф  беш аз пеш густариш меёбад.
    С. Хайруллоев аз ҳамкории густурда ва ҳасанае, ки байни дафтари намояндагии «Россотрудничество»-и  Русия дар Душанбе ва ҶДРФТ ҷараён дорад, изҳори қаноатмандӣ намуд.  Любов Глебова -раиси президиуми ташкилоти «Россотрудничество»-и Русия омодагии худро барои боз ҳам густариш додани робита байни ҶДРФТ ва ниҳоди зери назараш эълом дошт. Мавсуф гуфт, ки Ҷумҳурии Тоҷикистон дар миёни  кишварҳои пасошӯравӣ бо «Россотрудничество» ҳамкории густурда дорад, ки мояи ифтихори ҳайати роҳбарикунандаи он аст.