Сафи муҳоҷирони меҳнатӣ ба ФР коҳиш ёфтааст

Душанбе, 16.07.2015. (АМИТ «Ховар», Лайло Тоирӣ).-Дар шаш моҳи соли равон сафи муҳоҷирони меҳнатии тоҷик дар ФР 14-15 фоиз коҳиш ёфтааст, -гуфт вазири меҳнат, муҳоҷират ва шуғли аҳолии ҷумҳурӣ Сумангул Тағойзода имрӯз зимни нишасти матбуотӣ. 
Бино ба гуфтаи вазир сабаби асосии кам шудани теъдоди муҳоҷирони меҳнатии тоҷик дар ҳудуди Русия- ин буҳрони иқтисодӣ,  хориҷ шудани бештари муҳоҷирони корӣ ва ворид гаштани як зумра талаботи нав нисбат ба шаҳрвандони хориҷӣ мебошад. 
Мутобиқи натиҷаи баҳисобгирӣ дар нимсолаи аввали соли равон аз ҷумҳурӣ 336 ҳазору 625 шаҳрванд ба хориҷи кишвар ҳамчун муҳоҷири меҳнатӣ сафар намуда, аз ин шумора 331 253 нафар ба Федератсияи Русия ба кор рафтааст. 
Вале ба қавли Сумангул Тағойзода шумораи муҳоҷироне, ки ба таври қонунӣ дар Русия ба кор машғуланд, нисбат ба солҳои пешин бештар шуда истодааст.