Саломатии инсон боигарии миллат аст

Душанбе, 09.07.2015. (АМИТ «Ховар», Лайло Тоирӣ).- «Саломатии инсон-боигарии миллат»- зери  чунин унвон дар  ноҳияҳои Ҷиргатол ва Рашт барои дар амал татбиқ намудани лоиҳаи «Мустаҳкамкунии иқтидори шарикони ҷамъиятӣ бо беҳтарин шароити манзилӣ ва ҳифзи иҷтимоӣ» ярмаркаи саломатӣ доир гардид. 
Тавре ки аз Кумитаи кор бо занон ва оилаи назди Ҳукумати Ҷумҳурии Тоҷикистон хабар доданд, соли дуюм аст, ки бо ибтикори кумита  дар ҳамдастӣ бо намояндагии СММ оид ба нуфуси аҳолӣ (ЮНФПА) дар ноҳияҳои минтақаи Рашт ярмаркаи саломатӣ гузаронида мешавад.
Ярмарка  бо ҷалби мутахассисони варзидаи соҳаи тиб: духтури бемориҳои занона, духтури касалиҳои дарунӣ (терапевт), ҳуқуқшиносону мутахассисони соҳаи гендерӣ ба роҳ монда шуд. Аз хизмати мутахасиссон ва  ташхиси ройгони ултрасадо занону ҷавондухтарон, кӯдакону ноболиғони ноҳияҳои номбурда истифода намуданд.