Сардори Раёсати маориф: Барои қабули хонандагон ба синфи 1 санҷиш нагиред!

 Суғд,  14.07.2015. (АМИТ «Ховар», Андар Раҳмонӣ).- Дар толори Раёсати маорифи вилояти Суғд ҷаласаи навбатии ҳайати мушовараи раёсат барпо гардид. Дар ҷаласа ҳисоботи фаъолияти соҳаи маорифи вилоят дар  нимсолаи аввали соли ҷорӣ ва  масъалаҳои  мубрами соҳа мавриди баррасӣ қарор дода шуданд.
Аз рӯи масъалаи ҳисоботи фаъолияти соҳа дар нимсолаи  якум  муовини сардори Раёсати маорифи вилоят  Сайфулло Раҳматов доир ба натиҷаи санҷиши  «Барномаи  рушди  соҳаи тарбияи томактабӣ  барои солҳои 2012-2020», «Низомномаи  намунавии  муассисаҳои  таҳсилоти томактабӣ дар  кӯдакистонҳои хусусӣ», «Барномаи давлатии  таъмини муассисаҳои  таълимию илмии ҷумҳурӣ бо кабинетҳои фаннӣ, озмоишгоҳҳои муҷаҳҳази  таълимӣ ва  илмию таҳқиқотӣ барои солҳои 2011-2015», «Барномаи давлатии сохтмон, таъмиру навсозии  мактабҳо барои солҳои  2008-2015» маълумот доданд.
Сардори Раёсати маорифи вилоят Осим  Каримзода диққати ҳозиринро ба беҳтар намудани ҳайати сифатии омӯзгорон дар соли нави таҳсил, пешниҳоди имтиёзҳои муқарраршуда ба омӯзгорони ҷавон, баҳодиҳии воқеӣ ба дониши хонандагон, пешниҳоди таклифҳо ба нақшаи нави таълим, омодагӣ ба соли нави таҳсил,  аттестатсияи  такрории хатм ва аз синф ба синфгузаронӣ, манъи санҷишҳо ҳангоми қабули хонандагон ба синфи якуми мактабҳои таҳсилоти умумӣ, ғайр аз литсею гимназияҳо, таъмини хатмкунандагони   маҳфилҳои касбомӯзӣ бо сертификат, таъмини  мактаббачагон бо  либоси шинаму зебо ва нархи арзон  ҷалб намуд.