Сеюмин Ҷоми «Истиқлол» барои дастаҳои футболи хурди вазорату идораҳо

Душанбе, 21.07.2015 (АМИТ «Ховар», Фарзонаи Давлат).- Рӯзҳои наздик дар шаҳри Душанбе сеюмин мусобиқаи ҷумҳуриявӣ оид ба футболи хурд барои дарёфти Ҷоми Клуби футболи “Истиқлол” бо мукофотпулии калон оғоз меёбад.
Ба иттилои торнамоии расмии клуби футболи шаҳри Душанбе, мусобиқа аввали моҳи август дар майдончаҳои сабзаашон маснӯии Варзишгоҳи марказии ҷумҳуриявӣ шурӯъ мешавад.
Дар Ҷоми навбатии Клуби футболи “Истиқлол”, дастаҳои футболи хурди вазоратҳо, сохторҳои қудратӣ, корхонаву муассисаҳо, бонкҳо, сафоратхонаву намояндагиҳои давлатҳои хориҷии мустақар дар ҷумҳурӣ ва инчунин дигар идораҳо иштирок мекунанд. 
Гуфта мешавад ҳаққи узвият барои ширкат дар мусобиқа 3000 (се ҳазор) сомонӣ муқаррар шудааст. Дар мусобиқа бозигарони аз 24 сола боло ҳуқуқи иштирок карданро доранд. Бозингарони дастаҳои лигаи оливу якум ва ҳайатҳои ҷавонони дастаҳои лигаи олии Тоҷикистон ба мусобиқа роҳ дода намешаванд.
Мукофотпулии Ҷоми имсолаи Клуби футболи “Истиқлол” 70 000 (ҳафтод ҳазор) сомониро ташкил медиҳад. Дастаи ғолиб бо Ҷом ва мукофотпулӣ дар ҳаҷми 40 000 (чил ҳазор) сомонӣ, дастаи финалист бо 20 000 (бист ҳазор) сомонӣ ва барандаи медалҳои биринҷӣ бо маблағ дар ҳаҷми 10 000 (даҳ ҳазор) сомонӣ мукофотонида мешаванд. Роҳбарони дастаҳои ҷоизадор ва бозингарони беҳтарин бо ифтихорномаю мукофотҳои молӣ сарфароз гардонида мешаванд.
Машварати намояндагони дастаҳои иштирокчӣ 25 июли соли равон доир мешавад.