Талош барои роҳандозии парвозҳо дар хатсайри Душанбе-Хоруғ

Душанбе, 20.07.2015 (АМИТ «Ховар», Фарзонаи Давлат).- Файзулло Сатторов, директори ҶСК “Тоҷик Эйр” гуфт, хатсайри Душанбе-Хоруғ қатъ нахоҳад шуд, баръакс онҳо талош доранд ҳарчи бештар  парвозҳоро дар ин хатсайр роҳандозӣ кунанд. Ин матлаб имрӯз, 20-уми июл зимни ҷамъбасти нимсолаи аввали соли равон ба хабарнигорон ироа гардид. Ба гуфтаи мавсуф, хатсайри Душанбе-Хоруғ  ду ҳафтаи охир аз мавзӯъҳои асосӣ дар ҷаласаҳои “Тоҷик Эйр” мебошад. Бо вуҷуди хатарбор будани хатсайр роҳбарияти “Тоҷик-Эйр” фикри гирифтани даромад аз ин парвозҳоро надорад. Мо талош мекунем, ки парвозҳо ҳар чӣ бештар анҷом дода шаванду мушкили мусофирон ҳал гардад, вале онҳое, ки фикр мекунанд, мо метавонем тамоми сол аз рӯи ин масир парвозҳоро анҷом диҳем, хато мекунанд,-афзуд Ф. Сатторов. 
Ҳамчунин ӯ гуфт, ки парвоз дар ин хатсайр вазнинтарин дар ҷаҳон аст. Дар ҳоли ҳозир аз рӯи ин масир ягон таҷҳизот нест ва ҳавонавардҳо аз рӯи диди озод аз рӯи таҷҳизоти ҳавопаймо парвоз мекунанд. Дар ин масир ягон таҷҳизот насб нашудааст. Агар як миқдор абр пайдо шавад, ягон кас аз рӯи меъёрҳои амниятӣ ҳуқуқи иҷозати парвозро надорад. 
Ба гуфтаи ӯ мушкилот дар хатсайри Хоруғ-Душанбе шояд солҳои оянда, баъди он, ки дар ин хатсайр “датчик”-ҳо насб шаванд, ҳал гардад, зеро танҳо дар сурати насби “датчик”-ҳо ширкат метавонад новобаста аз боду ҳаво ба Хоруғ парвоз анҷом диҳад, гуфт директори ҶСК «Тоҷик Эйр».