«Уқоби даштӣ — 2015» дар Қазоқистон доир шуд

Душанбе, 20.07.2015. (АМИТ «Ховар», Лайло Тоирӣ).- Машқхои муштараки ситодӣ-фармондеҳӣ дар машқгоҳи таълимии «Илийский»-и Ҷумҳурии Қазоқистон таҳти унвони «Уқоби даштӣ — 2015» дар ду дав рва дар давоми 10 рӯз ба таври назариявию амалӣ ҷараён гирифтанд.
Дар машқҳо гурӯҳҳои амалиётии Қувваҳои Мусаллаҳи ҷумҳуриҳои Тоҷикистон, Қазоқистон, Қирғизистон, Туркия, Непал, инчунин намояндагон аз Фаронса, Британияи Кабир ва Иёлоти Муттаҳидаи Амрико ширкат намуданд.
Ҳадафи машқҳои муштараки ситодӣ-фармондеҳӣ- ин такмил додани донишу малака, таҳлили амиқи вазифаҳои ҷангӣ ва омодагии доимии ҷузъу томҳо тибқи низомномаи Созмони Миллали Муттаҳид ҳангоми иштирок дар амалиёти сулҳҷӯёнаро дар бар мегирифт.
Тавре ки аз Вазорати мудофиаи ҷумҳурӣ иттилоъ доданд,  гурӯҳҳои амалиётии Ситоди генералии Қувваҳои мусаллаҳи Ҷумҳурии Тоҷикистон дар чунин машқҳои муштараки ҳарбӣ бори сеюм аст, ки ширкати фаъолона карда, дар самти иҷрои вазифаҳои ҷангӣ аз худ маҳорати баланди касбӣ нишон доданд. Зимни анҷом ва натиҷагирӣ аз даври ниҳоии машқҳои муштараки ситодӣ-фармондеҳии «Уқоби даштӣ-2015»  байни низомиёни Қувваҳои Мусаллаҳи 8 давлат мубодилаи афкор сурат гирифта, иштирокдорони он бо туҳфаҳои хотиравӣ сарфароз гардонида шуданд.