Ҳукуматдорони Туркия сарҳадот бо Сурияро таҳким мебахшанд

Душанбе,  23.07.15. (АМИТ «Ховар»). – Ҳукумати  Туркия  усулҳои  таҳким  бахшидани  сарҳадот бо  Сурияро  барои  муҳофизат  аз  гурӯҳи  террористии «Давлати  исломӣ» баррасӣ намуд.
Намояндаи  расмии девони  вазирон  ва ноиби  сарвазир  Бюлент Аринч аз  рӯи  натиҷаи  ҷаласа  хабар  дод, ки гап  дар  бораи  таҳким  бахшидани  сарҳадот ва рӯи  кор  овардани системаҳои  иловагии  назорат  меравад. 
«Вазорати амнияти  миллӣ лоиҳаи  худро   пешниҳод  намуд, ки дар  он  ба ҷилавгирии  имконоти аз  сарҳад  гузаштани  террористони  ДИ  диққати  асосӣ дода  мешавад. Барои  ин  дар  сарҳад  системаҳои  дахлдори бехатарӣ  насб мешаванд. Алҳол қитъаҳои хатарноки сарҳад муайян  гардида, дар онҳо  воситаҳои  навтарини техникӣ   назорат  гузошта мешаванд», — гуфт  Бюлент Аринч. 
Аринч  дар  мавриди  масъалаи  муборизаи  судманди  Туркия  бо  «Давлати  исломӣ»  изҳор  дошт, ки  ҳар  бадгумонӣ  дар  бораи  кифоят  накардани тадбирҳои   зикршуда  асосе  надоранд. «Кишвари мо  зидди  ҳар  зуҳуроти  терроризм  ва   созмонҳои  террористӣ  муборизаи  қатъӣ  мебарад. Мо ба  эътилофи  байналмилалии   зидди «Давлати  исломӣ» ҳамроҳ  шуда,  уҳдадориҳоямонро  баҷо  меорем. Мо  аз  1  январи  соли равон  600  нафарро  бо  гумонбари  робита доштан  бо «Давлати  исломӣ»  дастгир  намуда, 102  нафари онҳоро дар  зиндонҳо  нигоҳ  медорем», —  гуфт мавсуф.
Ба  гуфтаи  Аринч,  амалиётҳои  охирини  террористӣ  нишон  доданд, ки ДИ барои ташкили ҳамлаҳо  имконият  дорад ва  Туркия  барои  муқовимат ба  гурӯҳи  террористӣ «бояд чораҳои  зарурӣ  бинад».