Зарари офати табиӣ ба ҷамоатҳои деҳоти ноҳияи Рашт

Душанбе, 21.07.2015. (АМИТ «Ховар», Лайло Тоирӣ).- Рӯзи 20 июл тақрибан соати 17.30 дар ҷамоати деҳоти Боқӣ Раҳимзода, деҳаи Панбуни минтақаи Рашт  бар асари  боришоти зиёд ва фаромадани ярч пеши дарёи Камаров банд гардида,  дар натиҷа 6 хонаи истиқоматӣ қисман,  2 оғилхона пурра,  10 км роҳи байни деҳа,   2 кӯпруки одамгузар,  1 кӯпруки мошингузар,  2 осиёб ва 1 истироҳатгоҳи шахсӣ пурра вайрон гардид. 
Бино ба иттилои сардори хадамоти матбуоти Кумитаи ҳолатҳои фавқулода ва мудофиаи гражданӣ Ориф Нозимов, дар ин рӯз инчунин бар асари боришот дар ҷамоати деҳоти Навдӣ,  деҳаи Бедак зиёда аз 50 хоҷагӣ пурра,  100 хоҷагӣ қисман зарар дида, инчунин шаҳрванд Мунаваршоҳ Сироҷов, маъюби гурӯҳи 1, истиқоматкунандаи деҳаи Бедак, соли таваллудаш  1987 ҳалок гардид. Дар ин рӯз дар деҳаи Қарасойи ҷамоати деҳоти Кашшот бар асари боришоти сахти кӯтоҳмуддат аз ду тарафи деҳа сел фаромада,  дар натиҷа заминҳои кишт зарар диданд.
Дар деҳаи Октангии ҷамоати деҳоти Шаҳристони вилояти Суғд бар асари боришоти  зиёд 200 метр роҳи мошингарди деҳа банд гардида,  1 гектар замини гандум, 0,5 гектар картошка, 50 сафедор, 500 чорвои майда нобуд гардид.