Авбошӣ ба куштор анҷомид

Душанбе, 01.08.2015. (АМИТ «Ховар»). — 29 июли соли ҷорӣ тахминан соати 01:00 дақиқа дар назди “Тоҷиктелеком”-и ноҳияи Рӯшон шаҳрвандон-Фарҳодов Наҷиб, соли таваллудаш 1992, Акобиршоев Сиёвуш, соли таваллудаш 1996,  Рӯзадоров Раҳмат, соли таваллудаш 1995, Кименов Бадавлат, соли таваллудаш 1995, донишҷӯёни донишгоҳҳои гуногун, Шакарбеков Хушбахт, соли таваллудаш 1987, Хушқачинов Шоҳхуррам, соли таваллудаш 1997, Фатҳуллоев Алишер, соли таваллудаш 1993, Юсуфшоев Арун, соли таваллудаш 1985 ва Сардоров Тавакал, соли таваллудаш 1989, сокинони ноҳияи Рӯшон, аз ҳиссиёти авбошӣ тартиботи ҷамъиятиро дағалона вайрон намуда, ронандаи автомашинаи тамғаи “Ланд-Крузер” Ёқубов Асрат, соли таваллудаш 1978, сокини деҳаи Барӯшонро лату кӯб намудаанд. 
Дар натиҷа шаҳрванд Ёқубов А.С., зарари ҷисмонӣ ба саломатӣ бардошта, рафта аз хонаи истиқоматиаш тапончаи тамғаи “Макаров”, ки ғайриқонунӣ нигоҳ медошт, гирифта ба назди “Тоҷиктелеком” баргашта, ба тарафи ҷавонони номбаршуда тир холӣ менамояд. Дар натиҷа шаҳрванд Кименов Б., донишҷӯи бахши дуюми Донишкадаи тарбияи ҷисмонии Тоҷикистон аз қисмати сараш ҷароҳати вазнини ҷисмонӣ бардошта, ҳангоми ба беморхона дастрас намудан дар роҳ ба ҳалокат расидааст. 
Зимни гузаронидани чорабиниҳои оперативӣ-ҷустуҷӯӣ шаҳрвандони дар боло номбаршуда дастгир гардиданд.
Ҳамчунин, гумонбар дар ҷинояти куштор шаҳрванд Ёқубов Асрат, соли таваллудаш 1978, сокини деҳаи Барӯшони ноҳияи Рӯшон, ронандаи мусофиркаши хатсайри Душанбе-Рӯшон дастгир гардида, дар ҳабси пешакӣ қарор дорад. Далели шайъӣ силоҳи оташфишони таппончаи “Макаров” гирифта шуд.
Аз рӯи ин ҳодиса парвандаи ҷиноятӣ оғоз гардида, тафтишот идома дорад.