Барқияи табрикоти А.Абдуллозода бахшида ба Рӯзи варзишгарон

Душанбе, 10.08.2015. (АМИТ «Ховар», Фарзонаи Давлат).- Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Аҳтам Абдуллозода варзишгарони кишварро бахшида ба Рӯзи варзишгарон, ки ҳамасола 10-уми август дар тамоми дунё таҷлил мегардад, табрик намуд.
Ахтам Абдуллозода, варзишгаронро беҳтарин муаррифгар, номбардор ва Парчамбардорони кишвар номида, онҳоро ба муносибати Рӯзи варзишгарон, ки маҳз ба хотири дастгирӣ ва ҳавасмандгардонии онон  ҷашн гирифта мешавад, самимона табрик намуд.
Аз ҷумла дар пайёми табрикотии Абдуллозода омадааст: Мояи ифтихор ва сарфарозист, ки варзиш рӯз ба рӯз дар кишвари соҳибистиқлоли мо рушду инкишоф ёфта, қисмати асосии аҳолии мамлакат рӯ ба он овардаанд. Рӯй овардани ҷавонону наврасон ба варзиш аз солимии миллати тоҷик шаҳодат дода, барои тарғибу ташвиқи тарзи ҳаёти солим заминаи мусоид гузоштааст. 
Эълон гардидани 10 август  ҳамчун Рӯзи варзишгарон ва таҷлили ҳамасолаи он дар сатҳи баланд аз таваҷҷуҳи бевоситаи Ҳукумати мамлакат нисбат ба соҳаи варзиш шаҳодат медиҳад. 
Имрӯз соҳаи варзиш дар меҳвари сиёсати созандаи Ҳукумати кишвар  қарор гирифта, нисбат ба варзишгарон дастгирию ғамхориҳо пайваста зоҳир карда мешаванд. Аз ҷумла, таъсиси Ҷоизаи нав, ки аз ҳисоби Фонди захиравии сарвари кишварамон Эмомалӣ Раҳмон аст, гувоҳии ин аст.
Боиси хушнудист, ки дар шароити имрӯзаи рушд варзиш машғулияти асосии мардум, бахусус наврасону ҷавонон гардида, дар ин замина варзишгарони тоҷик борҳо дар мусобиқаҳои сатҳи байналмилалӣ Парчами миллии кишварро баланд бардоштаанд. 
Воқеан ҳам дар замони муосир варзиш яке аз воситаҳои асосии муаррифии кишвари соҳибихтиёри мо дар байни ҷомеаи байналмилалӣ маҳсуб ёфта, таҷлили Рӯзи варзишгарон ҳамасола дар кишвар барои тамоми варзишгарону алоқамандон ва собиқадорони соҳаи варзиш тӯҳфаи арзанда мебошад.