Боздиди Вазири корҳои дохилӣ аз қисмҳои ҳарбӣ

Душанбе, 06.08.2015. (АМИТ «Ховар»). — Вазири корҳои дохилии мамлакат Раҳимзода Рамазон Ҳамро зимни сафари корӣ ба вилояти Хатлон ба ноҳияи Панҷ рафта, аз қисмҳои ҳарбии 2610 ва 2630 қӯшунҳои сарҳадӣ боздид ба амал овард.
Тавре ки ба АМИТ «Ховар» корманди масъули ВКД Маҳбуба Гулова иттилоъ дод, Рамазон Раҳимзода ба дидбонгоҳи сарҳадии мавзеи Қафлотун ташриф оварда, дар маросими кушодани лӯлаи об иштирок намуд. Мавриди қайд аст, ки лӯлаи об аз дарёи Панҷ оварда шуда, қисми низомӣ бо оби нӯшокӣ таъмин карда шуд.  
Вазири корҳои дохилӣ аз рафти корҳои сохтмонӣ ва тармиму таҷдид дар қисми низомӣ дидан намуда, ба масъулин барои босифат анҷом додани корҳои созандагӣ дастуру супоришҳо дод. Рамазон Раҳимзода бо афсарону сарбозони қисми ҳарбӣ ҳамсуҳбат шуда, аз ҳолу аҳвол, шароит ва рафти хизматбарии онҳо пурсон шуд. Таъкид карда шуд, ки сарвари давлат ва роҳбарияти ҳукумати мамлакат барои дар шароити мусоид хизмат намудани афсарону сарбозон тамоми тадбирҳоро андешида, ба онҳо таваҷҷуҳи хоса зоҳир менамоянд.    
Вазири корҳои дохилӣ Рамазон Раҳимзода ҳамчунин ба қисми ҳарбии 2630 қӯшунҳои сарҳадӣ ташриф оварда, бо шароити хизматбарии сарбозон ошноӣ пайдо намуд. Зимни шиносоӣ Вазири корҳои дохилӣ бо афсарону сарбозони қисми ҳарбӣ ҳамсуҳбат шуда, аз ҷойи хоб, ошхона, сартарошхона, ҳаммом ва дигар иншооти моддӣ-маишии онҳо дидан кард.
Зикр гардид, ки сарбозони далеру шуҷои Ватан барои ҳифзи марзу буми кишвари азизамон ҳамеша омода буда, аз ӯҳдаи вазифаҳои ба дӯшашон вогузоршуд  бо сарбаландӣ мебароянд.