Иштироки дастаи Қувваҳои Мусаллаҳи Ҷумҳурии Тоҷикистон дар Чемпионати ҷаҳон оид ба биатлони танкӣ

Душанбе, 10.08.2015. (АМИТ «Ховар», Лайло Тоирӣ).-Аз 21-ум июл то 16-уми августи соли 2015 дар ҳудуди Федератсияи Русия, дар машқгоҳи «Алабино» Чемпионати ҷаҳон оид ба биатлони танкӣ (танковый биатлон) таҳти унвони Мусобиқаи умумиҳарбӣ-2015 («АрМИ-2015») баргузор шуда истодааст, ки дар он дастаҳо аз Қувваҳои Мусаллаҳи 13 давлат иштирок менамоянд.
Бори аввал аст, ки дар ин мусобиқаи умумиҳарбии байналмиллалӣ аз Қувваҳои Мусаллаҳи Ҷумҳурии Тоҷикистон як даста иборат аз 3 экипаж ширкат меварзанд.
Рӯзи 25-уми июли соли 2015 қуръапартоӣ доир гардида, дар натиҷа рангҳои танкҳои дастаҳои иштироккунанда ва навбати онҳо муайян карда шуданд. Ҳамчунин натиҷаи қуръапартоӣ нишон дод, ки дастаи Тоҷикистон дар навбати аввал бо танкҳои рангаш сабз сабқат намуда,  дар ин навбат, дастаҳо аз Ҷумҳурии Сербия, Венесуелла ва Никарагу низ ҳамроҳ мебароянд.
Дастаи Қувваҳои Мусаллаҳи Ҷумҳурии Тоҷикистон 1-уми августи соли 2015 аллакай ду навбати худро дар биатлони танкӣ гузаронид. Мавриди зикр аст, ки баромади дастаҳо дар се марҳила, индевидуалӣ, нимфиналӣ ва финалӣ сурат мегирад.
Ҷараёни мусобиқа нишон дод, ки дастаи Қувваҳои Мусаллаҳи Ҷумҳурии Тоҷикистон ба даври нимниҳоӣ баромадааст. 
Чунон ки аз хадамоти матбуоти Вазорати мудофиа иттилоъ доданд, дастаи Қувваҳои Мусаллаҳи Ҷумҳурии Тоҷикистон як моҳ қабл аз баргузории мусобиқаи мазкур дар машқгоҳи Лоҳур бо роҳбарии сардори Раёсати тайёрии ҷангии Вазорати мудофиа полковник Баҳром Зоирзода омодагии ҳамаҷониба гирифта буданд.