Мусодираи қариб 30 кило героин аз ҷониби кормандони милитсия

Душанбе, 01.08.2015. (АМИТ «Ховар»). — Аз ҷониби кормандони Раёсати Вазорати корҳои дохилӣ дар нақлиёт 30 июл зимни гузаронидани чорабиниҳои оперативӣ-ҷустуҷӯӣ дар роҳи мошингарди кӯчаи А.Ҷомии шаҳри Душанбе, наздикии бозорчаи маҳаллаи 46, автомашинаи тамғаи “Опел-Астра”, таҳти идораи ронанда, марди 44-солаи сокини Душанбе боздошт карда шуд. 
Ҳангоми азназаргузаронии автомашинаи мазкур кормандони оперативӣ аз бордонаш 3-адад пакети селофанӣ, ки дар дохилаш маводи мухаддир нигоҳ дошта мешуд, дарёфт намуданд. 
Мувофиқи ташхиси криминалистӣ маводи мусодирагардида ба маводи сахттаъсири героин мансуб буда, вазни умумиашон 29 килою 240 граммро ташкил медиҳад. 
Нисбати далели мазкур парвандаи ҷиноятӣ оғоз гардида, тафтишот идома дорад.