Пирӯзии қаиқрони ҷавони тоҷик дар Португалия ва роҳхат ёфтанаш ба Италия

Душанбе, 04.08.2015 (АМИТ «Ховар» Ситораи Боймурод).- Шаҳриёр Даминов, варзишгари тоҷик, дар мусобиқаи қаҳрамонии қаиқронии ҷаҳон байни ҷавонон дар Португалия дар сабқати гурӯҳӣ мақоми аввалро соҳиб шуд.
Тавре аз Хадамоти матбуотии Кумитаи миллии олимпии Тоҷикистон хабар доданд, дар мусобиқаи қаҳрамонии ҷаҳон оид ба қаиқронӣ дар байдарка ва каноэ байни ҷавонони синнашон аз 18 то 23-сола, ки бо иштироки 500 варзишгар аз 37 кишвари ҷаҳон дар шаҳри Лиссабони Португалия баргузор шуд, Тоҷикистонро танҳо як нафар, Шаҳриёр Даминов намояндагӣ кард. Шаҳриёр Даминов дар каноэи яккаса ба масофаи 1000 метр дар сабқати ниҳоӣ бо натиҷаи 4 дақиқаю 06,948 сония ғолиб омад. Дар ҷамъбасти умумӣ дар байни 36 нафар варзишгари тоҷик ҷойи ҳафтумро соҳиб шуд.
Нодир Сафаров, дабири кулли Федератсияи қаиқронони Тоҷикистон ба АМИТ «Ховар» хабар дод, ки «Натиҷаи нишондодаи қаиқрони ҷавон Шаҳриёр Даминов дар мусобиқаи қаҳрамонии ҷаҳон байни ҷавонон дар таърихи ин намуди олимпии варзиш дар замони Истиқлолияти Тоҷикистон беназир аст. Шаҳриёр донишҷӯи бахши дувуми Донишкадаи тарбияи ҷисмонии Тоҷикистон ба номи Саидмуъмин Раҳимов буда, шаш сол инҷониб ба қаиқронӣ машғул мебошад».
Шаҳриёр Даминов бо натиҷаи нишондодааш дар Португалия ҳуқуқ пайдо кард, дар мусобиқаи қаҳрамонии қаиқронии ҷаҳон байни бузургсолон, ки рӯзҳои 20-24 август дар шаҳри Милани Италия баргузор мешавад, ширкат варзад. 
Ёдовар мешавем, Шаҳриёр Даминов соли гузашта дар мусобиқаи қаҳрамонии Осиё дар шаҳри Самарқанд дар каноэи яккаса ба масофаи 200 метр мақоми севумро соҳиб шуда, бо медали биринҷӣ сарфароз гардида буд.