Роҳи Ағбаи Оббурдон барқарор мешавад

Душанбе, 01.08.2015. (АМИТ «Ховар»). — Бар асари хокрезиш аксари минтақаҳои роҳи мошингарди ағбаи Оббурдон, ки дар мавсими тобистон тавассути он мардуми ноҳияи Кӯҳистони Мастчоҳ ва қисман ноҳияи Айнӣ ба дигар минтақаҳои вилояти Суғд рафту омад мекунанд, хароб гардидаву барои ҳаракати воситаҳои нақлиёт хатарнок буд.
Тавре ки аз хадамоти матбуоти раиси вилояти Суғд иттилоъ доданд, бо супориши роҳбарияти мақомоти иҷроияи ҳокимияти давлатии вилояти Суғд барои омода намудани роҳи ағбаи Оббурдон ва таъмини бехатарии ҳаракати воситаҳои нақлиёт дар он беш аз 100 ҳазор сомонӣ маблағ равона карда шудааст. Корҳои васеъкунии роҳ ва тахту ҳамворсозӣ дар ду ҷониб — ҳам ба самти деҳаи Оббурдони ноҳияи Кӯҳистони Мастчоҳ ва ҳам ба самти деҳаи Овчии ноҳияи Ғончӣ бо суръат пеш мераванд.
Роҳсозон новобаста аз ҳарорати пасти ин мавзеъ фаъолияти мунтазамро ба роҳ монда, наздик 60 фоизи корҳоро ба анҷом расонидаанд. Роҳсозон аз ду ҷониб роҳро васеъ намудаву дар ҳар гардишгоҳ барои таваққуфи нақлиётҳо ҷой омода месозанд.
Барои анҷоми корҳои тахту ҳамворкунӣ ва васеъкунии роҳи мошингарди ағбаи Оббурдон техникаҳои зарурӣ ва наздик ба даҳ нафар қувваи корӣ ҳамарӯза ба кор ҷалб карда шудаанд. 
Роҳи ағбаи Оббурдон, ки дар маҷмӯъ ҳудуди 50 километрро дар бар мегирад, дар солҳои 80-уми асри гузашта мавриди баҳрабардорӣ қарор гиифта, то ба имрӯз сокинони минтақаҳои куҳӣ шурӯъ аз моҳи июн то моҳи октябр ҳамасола тавассути он равуо мекунанд.
Бо вуҷуди он ки дар ағба корҳои роҳсозӣ идома доранд, вале ҳаракати воситаҳои нақлиёт дар ду самт бе маҳдудият ба роҳ монда шудааст.