Ярмаркаи маҳсулоти ҳунармандӣ дар Душанбе

Душанбе, 31.08.2015 (АМИТ «Ховар»).- Рӯзҳои 5-6-уми сентябри соли равон бахшида ба ҷашни Истиқлолияти Ҷумҳурии Тоҷикистон  ярмаркаи маҳсулоти ҳунармандону косибон дар маркази Исмоилияи шаҳри Душанбе баргузор мешавад.
Ярмаркаи мазкур, ки бо ташаббуси Иттифоқи ҳунармандони Тоҷикистон дар ҳамкорӣ бо ташкилоти байналмилалии ғайридавлатии CESVI, Ассотсиатсияи миллии соҳибкории хурд ва миёнаи ҶТ дар доираи  Лоиҳаи «Ҳунармандӣ  ва  соҳибкорӣ ба воситаи ҳамгироии минтақавӣ ва савдои боадолат» гузаронида мешавад, давоми ду рӯз маҳсули офаридаи  ҳунармандон аз манотиқи мухталифи кишвар  аз қабили кандакорӣ, сабадбофӣ, гулдӯзи, сӯзанидӯзӣ, нақшофарӣ  дар маҳсулоти   сафолӣ,  зару зевари  заргарӣ  ва либосҳои  миллӣ бо шаклу қолаби замонавӣ, молҳои рӯзғордорӣ, маҳсулоти  чармин, армуғонҳои гуногун ба маъраз гузошта мешавад.