89 донишҷӯи тоҷик иҷозаи вуруд ба Русия гирифт

Душанбе, 14.09.2015 (АМИТ «Ховар»). — Хадамоти федералии муҳоҷират дар якҷоягӣ бо ВКХ Русия тартиби фаврии кор бо донишҷӯёни тоҷикро, ки дар муассисаҳои таҳсилоти олии Русия таҳсил мекунанд, таҳия кард. 
Бино ба иттилои Хадамоти муҳоҷирати ҷумҳурӣ, ба донишҷӯёни тоҷик, ки вурудашон ба Федератсияи Русия мамнуъ буд, тавсия дода шуд, ки бевосита ба намояндагии Хадамоти федералии муҳоҷирати Русия дар Тоҷикистон бо аризаи дахлдор ва нусхаи ҳуҷҷатҳои тасдиқкунанда муроҷиат намоянд.
Барои содир намудани қонуншикании маъмурӣ вуруди шаҳрвандони хориҷӣ ба Федератсияи Русия ба таври автоматӣ мамнуъ мегардад.
То ин дам ба хадамот 94 донишҷӯи тоҷик бо аризаи иҷозаи вуруд муроҷиат кардааст, ки ба  89 нафар иҷозаи вуруд дода шудааст.