Бонки миллӣ: муомилоти ғайринақдӣ сифатан беҳтар мегардад

Душанбе, 21.09.2015. (АМИТ «Ховар»).- Раиси Бонки миллии Тоҷикистон Ҷамшед Нурмаҳмадзода ва ноиби Президенти ширкати байналхалқии Visa International Service Association Майкл Доннелли оид ба низоми миллии ҳисоббаробаркуниҳо Созишномаи ҳамкориро ба имзо расониданд.
Минбаъд амалҳои ҳисоббаробаркунӣ бо кортҳои пардохтии Visa International дар ҳудуди ҷумҳурӣ танҳо бо пули сомонӣ, яъне бе амалиёти иловагии мубодилаи асъор сурат мегиранд.
То ин вақт соҳибони кортҳои Visa International ҳангоми ҳисоббаробаркунӣ дар муассисаҳои савдою хизматрасонӣ ба мушкилот рӯ ба рӯ мешуданд. Дар натиҷаи анҷом додани хариду фурӯши мол ва хизматрасонӣ бо муомилоти нақдӣ ва ғайринақдӣ муштариён зарари молиявӣ медиданд, ки ин то андозае боварии аҳолиро нисбат ба воситаҳои муосири пардохт ва низоми бонкӣ камтар мекард. Акнун бо имзо шудани Созишномаи ҳамкорӣ ин мушкилот то охири сол бартараф мешавад. Ҳоло марҳилаи аввали татбиқ намудани лоиҳаи мазкур оғоз ёфт.