Дар Тоҷикистон якчанд роҳи мошингард таҷдид мешавад

Душанбе, 16.09.15. (АМИТ «Ховар», Кристина  Эрлих). — То  охири  соли равон  татбиқи якчанд  лоиҳаи  нақлиётӣ барои таҷдиди  роҳҳои мошингарди  дохилӣ оғоз  меёбад. Аз  ҷумла, таҷдиди  роҳи  мошингарди Душанбе —  Турсунзода (аз дарвозаи  ғарбии  пойтахт то муҷассамаи  Сино) ва Хуҷанд —  Исфара дар  назар  аст. 
Тавре  ки  дар Вазорати  нақлиёти  ҶТ  ба  АМИТ «Ховар»  хабар  доданд, то  имрӯз дар  бахши  нақлиёти  ҷумҳурӣ 15 лоиҳа ба  маблағи 526  миллион доллари  ИМА дар  амал  татбиқ  мешавад. 
Алҳол омодагирӣ ва корҳои  лоиҳавию ҷустуҷӯӣ  аз  рӯи  бархе лоиҳаҳои нав идома доранд. Татбиқи  ин  лоиҳаҳо  имкон  медиҳад, ки Тоҷикистон  бо  кишварҳои  дигари ҳамҷавор,  яъне  бо инфрасохтори коммуникатсионии минтақавӣ пайваст  гардад. Таҷдиди  роҳи мошингарди Қалъаи  Хумб — Ванҷ  аз  ҷумлаи онҳост.
Алҳол  дар татбиқи  лоиҳаҳои  зикршуда  беш  аз  1  ҳазору 300  нафар мутахассисон  иштирок доранд, ки  76,3  фоизи онҳоро  шаҳрвандони  Тоҷикистон ташкил  медиҳанд.
Қобили  зикр аст, ки  солҳои охир  роҳҳои мошингарди Хуҷанд,  Қайроққум, Чкалов,  Исфара, Истаравшан, Панҷакент,  Конибодом, ҳамчунин  роҳҳои асосии  мошингарди  ноҳияҳои  Бобоҷон  Ғафуров, Ғончӣ ва  Мастчоҳи  вилояти  Суғд  мумфарш  карда шуданд.
Маблағи  умумии  корҳои  зикршуда  беш  аз 85  миллион  сомониро ташкил  дод. Ғайр  аз  ин,  соли  2014  масофаи 116 километри  роҳҳои  дохилии   шаҳри  Хуҷанди  вилояти  Суғд  таҷдид  гардида,  барои он 40  миллион  сомонӣ  аз  маблағҳои ҳам  буҷет ва  ҳам  соҳибкорони  маҳаллӣ  сарф  шудааст.