«Динамо» 17 давлати дунёро муттаҳид месозад

Душанбе, 23.09.2015 (АМИТ «Ховар»).-Аз 17 то 20-уми сентябри соли равон дар шаҳри Алмаатои Ҷумҳурии Қазоқистон ҷаласаи Шӯрои ҳамоҳангсозии байналмилалии ҷамъиятҳои «Динамо» баргузор гардид. 
Ҳамзамон 90-солагии Иттиҳоди ҷамъиятии варзишии «Динамо»-и Ҷумҳурии Қазоқистон бо иштироки вазири корҳои дохилии ин кишвар Калмуханбет Касимов таҷлил гардид. 
Дар кори ҷаласа намояндагон аз 17 давлати дунё, аз Ҷумҳуриҳои Беларус, Булғористон, Тоҷикистон, Туркманистон, Қирғизистон, Латвия, Молдова,  Украина, Федератсияи Русия ва Ангола ширкат варзиданд.
Дар ҷаласа масъалаҳо оид ба натиҷаҳои фаъолияти Шӯрои ҳамоҳангсозии байналмилалии ҷамъиятҳои «Динамо» дар соли 2015 ва гузаронидани мусобиқаҳо дар давоми соли 2016 мавриди баррасӣ қарор гирифтанд.
Намояндаи Ҷумҳурии Тоҷикистон, муовини аввали раиси Шӯрои ҷумҳуриявии «Динамо»-и Вазорати корҳои дохилӣ Аслиддин Шоҳиён ҳозиринро бо 90-солагии Иттиҳоди ҷамъиятии варзишии «Динамо»-и Ҷумҳурии Қазоқистон табрик намуда, ба онҳо дастовардҳои баланди варзишӣ таманно намуд.
Дар идомаи суханронӣ Шоҳиён Аслиддин зикр кард, ки дар моҳи майи соли 2015, ВКД Ҷумҳурии Тоҷикистон дар шаҳри Қайроққуми вилояти Суғд мусобиқаи футболи хурд байни аъзои Шӯрои ҳамоҳангсозии байналмилалии ҷамъиятҳои «Динамо»-ро таҳти шиори «Варзиш — зидди нашъамандӣ» баргузор намуд. Ҳамчунин баргузории чунин мусобиқаи сатҳи байналмилалӣ дар моҳи майи соли 2016 дар назар дошта шудааст.
Аслиддин Шоҳиён аз номи вазири корҳои дохилии Ҷумҳурии Тоҷикистон ба вазири корҳои дохилии Ҷумҳурии Қазоқистон, раиси Шӯрои ҳамоҳангсозии байналмилалии ҷамъиятҳои «Динамо» ва раиси Иттиҳоди ҷамъиятии варзишии «Динамо»-и Ҷумҳурии Қазоқистон туҳфаҳои хотиравӣ супорида, барои боз ҳам мустаҳкам шудани ҳамкорӣ ва дӯстию рафоқат байни варзишгарони шӯрои мазкур изҳори умедворӣ кард.