Эмомалӣ Раҳмон: Имсол 200 мактаби нав ба истифода дода мешавад

Душанбе, 01.09.2015. (АМИТ “Ховар”). — Ин нуктаро зимни суханронии хеш дар тантанаҳои Рӯзи дониш ва 70-солагии таъсиси Донишгоҳи давлатии Кӯлоб ба номи Абӯабдуллоҳи Рӯдакӣ Сарвари давлат Эмомалӣ Раҳмон баён дошт.
Президенти кишвар тазаккур дод, ки бунёди мактабҳои нави замонавӣ ва таъмиру таҷдиди  муассисаҳои таълимӣ васеъ ба роҳ монда шуда, барои таъмини муассисаҳои таълимӣ бо компютерҳо, озмоишгоҳҳо, техника ва технологияҳои муосир, инчунин ба шабакаи интернет пайвастани онҳо чораҳои доимӣ амалӣ шуда  истодаанд. 
Хотиррасон бояд кард, ки дар замони истиқлолият то ба имрўз дар кишвар 2254 муассисаи нави таълимӣ сохта, ба истифода дода шудааст. Ҳукумат дар оянда низ раванди ислоҳот, таъмиру азнавсозӣ ва бунёди муассисаҳои таҳсилоти умумиро идома мебахшад.