Машқҳои «Раъд-2015» анҷом ёфтанд

Сентябрь 5, 2015 05:28

Душанбе, 05.09.2015, (АМИТ «Ховар»). —  Тавре иттилоъ дода будем, 27-уми август бо иштироки ҷузъу томҳои таъиноти махсуси идора ва хадамоти зиддимухаддиротии кишварҳои аъзои СААД —  Арманистон, Белорус, Қазоқистон, Қирғизистон, Россия ва Тоҷикистон марҳалаи аввали машқҳои махсуси тактикӣ таҳти номи шартии «Раъд-2015» баргузор шуданд. Чорабинии мазкур бо мақсади баланд бардоштани малакаи касбии кормандони ҷузъу томҳои таъиноти махсус ҳангоми мусодираи маводи нашъадор, силоҳ, лавозимоти ҷангӣ ва маводи тарканда, инчунин ҳамоҳанг сохтани фаъолияти мақомоти идоракунӣ зимни чорабиниҳои муштарак амалӣ карда шуд. 
Рафти машқҳоро роҳбарони идораҳои зиддимухаддиротии кишварҳои аъзои Созмони аҳдномаи амнияти дастаҷамъӣ, Котиботи СААД, намояндагони Шӯрои амнияти ҶТ, роҳбарияти мақомоти ҳифзи ҳуқуқ ва сохторҳои қудратии Тоҷикистон, сафирон ва атташеҳои ҳарбии кишварҳои хориҷӣ, ки дар Тоҷикистон сукунат доранд, мушоҳида намуданд.  
Зимни машқҳои тактикӣ дастаҳо  намудҳои гуногуни техникаи ҷангӣ, аз ҷумла ошкор ва ҳуҷум намудан ба тарёкхонаҳо, мусодираи маводи нашъадор, силоҳ ва лавозимоти ҷангӣ, зада гардондани ҳуҷуми душман ба объектҳои мақомот, дастгир намудани ҷинояткороне, ки тавассути автомашинаҳо сарҳадро убур мекунанд, инчунин чорабиниҳои махсусро оид ба кофтуков, безараргардонии гуруҳҳои ҷиноятпеша ва озод намудани гаравгонон намоиш доданд.
Марҳилаи дуюми машқҳо дар ҳудуди вилояти Хатлон гузашт. Дар марҳилаи дуюм дастаҳо ҳаракатҳои кофтуковиро дар хатсайрҳои қочоқи маводи нашъаовар, муҳосира намудани ҷойҳои муваққатии нигаҳдории маводи нашъаовар ва забт кардани он, азназаргузаронии воситаҳои нақлиёт дар хатсайрҳои эҳтимолии қочоқи маводи нашъаовар тамрин намуданд. 4 гурӯҳи омехташудаи таъиноти махсус ва 2 дидбонгоҳҳои сайёр барои азназаргузаронии воситаҳои нақлиёт ташкил шуданд.
3-юми сентябри соли равон дар дидбонгоҳи «Момирак» маросими пӯшидашавии машқҳои тактикии махсуси  «Раъд-2015» сурат гирифт. Дар маросими пӯшидашавӣ қайд карда шуд, ки гузаронидани чунин чорабиниҳо ба ҳалли вазифаҳои амалӣ оид ба такмил додани механизми ҳамкории зиддимухаддиротӣ мусоидат менамояд. Дар хотима ба иштирокдорони машқҳо медалҳо, ифтихорнома, раҳматнома, тӯҳфаҳои хотиравӣ тақдим гардид.

 

Сентябрь 5, 2015 05:28

Хабарҳои дигари ин бахш

«ПАРАСТУ». Дар Бӯстон басти аввали истироҳатгоҳи шаҳрӣ оғоз гардид
Дар ноҳияи Ховалинг дар зиёда аз 600 гектар кишти картошка гузаронида мешавад
Имрӯз дар водиҳои Тоҷикистон ҳаво то 38 дараҷа гарм мешавад
Дар Донишгоҳи байналмилалии сайёҳӣ ва соҳибкории Тоҷикистон бахшида ба Даҳсолаи байналмилалии амал оид ба илмҳои яхшиносӣ ҳамоиш баргузор мешавад
Тавсия: барои алоқа дар Узбекистон маблағ камтар сарф мекунем
Дар соҳили Сирдарё барои истироҳату фароғат шароити хуб фароҳам оварда шудааст
Президенти Тоҷикистон ҳамоиши сатҳи олӣ — муаррифии Даҳсолаи байналмилалии барои илмҳои яхшиносӣ (криосферӣ)-ро ифтитоҳ намуданд
Дар Хуҷанд Мусобиқаи ҷумҳуриявӣ оид ба ҷудо байни наврасон ҷамъбаст гардид
Имрӯз дар шаҳри Душанбе ҳаво то 35 дараҷа гарм мешавад
ҚУРБИ АСЪОР: дар Тоҷикистон 1 рубли русӣ аз 0.1247 то 0.1240 сомонӣ муқаррар шудааст
Кишоварзони ноҳияи Восеъ дар гармхона бо усулҳои муосир маҳсулот парвариш мекунанд
Ваколатдор оид ба ҳуқуқи инсон вобаста ба ҳифзи ҳуқуқи соҳибкорон конфронси ҷумҳуриявӣ доир менамояд