Муроҷиатномаи Кумитаи иҷроия ва Шӯрои кӯҳансолони Ҳаракати ҷамъиятии ваҳдати миллӣ ва эҳёи Тоҷикистон ба мардуми шарифи Тоҷикистон

Сентябрь 8, 2015 11:19

Душанбе, 08.09.2015. (АМИТ «Ховар»).
Ҳамватанони азизу меҳрубон!
Ҳодисаҳои номатлуби рӯзҳои 4-5 сентябри соли равон, ки дар шаҳри Душанбе ва шаҳри Ваҳдат аз ҷониби як гурӯҳи хиёнаткору ҷиноятпешаи низомӣ, ки бо роҳбарии генерали хоин Абдуҳалим Назарзода сурат гирифта, дар паяш талафоти ҷонӣ ва харобкорӣ ба амал омад, тамоми мардуми кишварамонро ба ташвиш овард.
Боиси таассуф аст, ки чунин нобасомониҳо дар давоми рӯзҳое анҷом гирифтанд, ки дар саросари ҷумҳурӣ, аз ҷумла дар пойтахти зебоямон Душанбешаҳр ба ифтихори ҷашни 24-солагии Истиқлолияти давлатии Тоҷикистон чорабиниҳо ва ташаббусу тантанаҳои ҷолибу шавқовар барпо гардида, кулли мардум, хусусан насли ҷавони мамлакат аз оромию субот, ваҳдату якпорчагии марзу бум ва иттиҳоди халалнопазир ифтихору сарбаландӣ карда, шукргузорӣ аз созандагӣ ва шукуфоии кишвар менамоянд.
Дар ҳоле ки мо имрӯз дар як ҷомеаи демократию ҳуқуқбунёд ба сар мебарем, ҳар кас фикру назари худро озодона баён медорад ва эъмори давлатеро ҳадафи худ қарор додаем, ки асоси онро риоя ва мурооти қонун ташкил медиҳад, доман задани чунин воқеаҳои номуносиб барои мардуми мутамаддини мо қобили қабул нест. Тоҷикон  аз азал халқу миллати созанда буданд, на сӯзанда.
Дар ҳамин замина дар тӯли солҳои истиқлолият бо талошҳои мақомоти олии мамлакат Тоҷикистони азизи мо симои худро ба маротиб дигар кард. Солона бо маблағҳои ихтисосдодаи Ҳукумати ҷумҳурӣ ва сармоягузории хориҷӣ дар қаламрави кишвар садҳо иншооти нав сохта, мавриди истифодабарӣ қарор мегиранд. Даҳҳо ҳазор ҷойҳои нави корӣ бунёд карда мешаванд. 
Бинобар ин таассуфовар ва боиси нигаронӣ аст, ки бархе мансабдорони низомӣ ва думравони он фирефтаи сухану ваъдаҳои бебунёди душманони миллати тоҷик ва иддае аз доираҳои ғаразҷӯ шуда, даст ба ҷинояткорӣ мезананд ва бо ин васила мехоҳанд, ки ба кору зиндагии осоиштаи мардум халал ворид намоянд. 
Лекин бо эътимоду боварӣ мо изҳор медорем, ки мардуми шарифи Тоҷикистон дар атрофи раҳбарияти олии кишвар, пешвои муаззами миллат муҳтарам Эмомалӣ Раҳмон зичтар муттаҳид гашта, намегузоранд, ки осоишу оромии ҷомеаро касе халалдор созад. Мусаллам аст, ки сохторҳои қудратӣ ва мақомоти интизомӣ дар муҳлати кӯтоҳ ҷинояткоронро боздошт ва ба муҷозот кашида, суботи саросариро таъмин менамоянд. 
Ба ҳамдиёрони азиз-мардуми сарбаланди Тоҷикистон муроҷиат менамоем, ки фирефтаи дасисаи бадхоҳони халқу миллат нашуда, ваҳдату якпорчагии Ватани азизамонро ҳифз намоем ва бо шукрона аз суботу оромии кишвар сарзаминамонро боз ҳам ободу шукуфо гардонем.

Муроҷиатнома дар ҷаласаи муштараки Кумитаи иҷроия ва Шӯрои куҳансолони Ҳаракати ҷамъиятии ваҳдати миллӣ ва эҳёи Тоҷикистон қабул шудааст.

Сентябрь 8, 2015 11:19

Хабарҳои дигари ин бахш

Дар Турсунзода 341 ҳолати вайронкунии қоидаҳои ҳаракат дар роҳ ошкор гардид
Дар даври дуюми Озмуни ҷумҳуриявии «Тоҷикистон-Ватани азизи ман» 2676 довталаб иштирок менамояд
Дар Кӯлоб омодагии мудофиаи ҳудудӣ ва захираҳои сафарбарӣ мавриди омӯзиш ва санҷиш қарор гирифт
ТАЪТИЛИ ТОБИСТОНА. Дар Зафаробод 1530 нафар хонанда ба истироҳат фаро гирифта мешавад
Имрӯз дар водиҳои Тоҷикистон ҳаво то 40 дараҷа гарм мешавад
Абдусалом Назаров дар боғаш 12 навъи зардолу парвариш менамояд
Дар доираи татбиқи «Барномаи рушди иқтисодию иҷтимоии ноҳияи Рашт барои солҳои 2021-2025» 256 иншоот сохта мешавад
Имрӯз дар шаҳри Душанбе ҳаво то 37 дараҷа гарм мешавад
Дар Ховалинг бахшида ба фаъолияти эҷодии шоир Ҳабибулло Файзулло маҳфили адабӣ доир мешавад
Дар ноҳияи Данғара ду коргоҳи истеҳсоли оксиген ба истифода дода шуд
Дар Донишгоҳи давлатии Хоруғ бахшида ба Рӯзи Ваҳдати миллӣ конфронси ҷумҳуриявӣ доир гардид
Имрӯз дар баъзе ноҳияҳои кӯҳии Тоҷикистон борони кӯтоҳмуддат меборад