Таҷлили Рӯзи Рӯдакӣ дар осорхонаи Хатлон

Душанбе, 21.09.2015. (АМИТ «Ховар»).-Ҳамасола 22 сентябр дар саросари  ҷумҳурӣ  ҳамчун Рӯзи Рӯдакӣ  бо шукӯҳу шаҳомати хосса таҷлил  мешавад. Бахшида ба ин сана дар Осорхонаи таърихию кишваршиносии вилояти Хатлон ба номи Авасто конфронси илмию адабӣ доир гардид. Дар он адибону шоирон  ва донишҷӯёни Донишгоҳи давлатии шаҳри Қӯрғонтеппа ва хонандагони муассисаҳои таълимии шаҳр фаъолона ширкат доштанд.
Дар конфронс иштирокчиён  зикр намуданд, ки  Абӯабдуллоҳи Рӯдакӣ дар ашъори гаронбаҳояш аз истифодаи калимаҳои бегона ва душворфаҳм худдорӣ намудааст. Ӯ на танҳо шакл ва навъҳои назми тоҷикиро ба ҳадди аъло расонидааст, балки мазмуни онро низ ғанӣ гардонидааст.
Ҳамин тавр, конфронси илмию адабӣ  хотирмон сурат гирифта, донишҷӯён ва муҳассилини мактабҳо аз эҷодиёти устод Абӯабдуллоҳи Рӯдакӣ ғазалҳо қироат карданд.