Террористон 56 хидматчии ҳарбии фурудгоҳи Сурияро қатл карданд

Душанбе, 21.09.15. (АМИТ «Ховар»). — Назар  ба  иттилои Маркази таҳқиқи риояи ҳуқуқҳои  инсони  Сурия, силоҳбадастон  дар фурудгоҳи ҳарбии Абу — ад — Дуҳури  музофоти Идлиби  кишвар 56  нафар хидматчиёни  харбии  артиши ҳукуматии  Сурияро  қатл  карданд. 
Тавре  ки қаблан хабар  дода шуда буд, 9 сентябр қувваҳои  мусаллаҳи  Сурия назорати  фурудгоҳи ҳарбии Абу — ад — Дуҳурро  аз  даст  дода буданд. Ҳарбиёне, ки беш  аз  ду  сол пойгоҳи ҳавопаймоиро аз  ҳамлаи силоҳбадастон ҳифз  мекарданд,  баъди  задухӯрдҳои  шадид мавқеъҳояшонро тарк  намуданд.
Дар  Сурия ихтилофоти  мусаллаҳона  аз  моҳи  марти  соли  2011 идома  ёфта,  бар  асари он, мувофиқи  маълумоти  СММ,  беш  аз  200  ҳазор нафар  халок  шудааст. 
Дастаҳои  силоҳбадастони  гурӯҳҳои  мухталифи  мусаллаҳ зидди қувваҳои  ҳукуматӣ ҳарбу  зарб  мекунанд, ки  ҷангиёни  гурӯҳҳои  ифротталаби «Давлати  исломӣ»  ва  «Ҷабҳат — ан — Нусра» аз ҷумлаи   фаъолтарини онҳо  ба  шумор  мераванд.