Барои гузаронидани аудити экологӣ доштани иҷозатнома ҳатмист

 Душанбе, 12.10.2015.(АМИТ «Ховар»).-Палатаи поёнии Парлумони Тоҷикистон ба лоиҳаи Қонуни Ҷумҳурии Тоҷикистон «Дар бораи  иҷозатномадиҳӣ ба баъзе намудҳои фаъолият» илова ворид намуд.
Шамс Назаров -муовини раиси Кумитаи ҳифзи муҳити зисти назди Ҳукумати ҷумҳурӣ дар Парлумон гуфт, ки ҳадафи пешниҳоди лоиҳаи Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият» ворид намудани тағйироти зарурӣ оид ба таъмини иҷрои талаботи моддаи 8- и Қонуни Ҷумҳурии Тоҷикистон «Дар бораи аудити экологӣ»  барои додани иҷозатнома оид ба ҳуқуқи гузаронидани аудити экологист. Яъне, минбаъд дар ҷумҳурӣ барои гузаронидани аудити экологӣ ташкилот бояд иҷозатнома дошта бошанд. Масъули  додани иҷозатнома Кумитаи ҳифзи муҳити зисти назди Ҳукумати ҷумҳурӣ маҳсуб мешавад.  
   Бояд тазаккур дод, ки Қонуни Ҷумҳурии Тоҷикистон «Дар бораи аудити экологӣ» принсипҳо ва тартиби гузаронидани аудити экологиро дар Тоҷикистон бо мақсади пешгирии таъсири манфии фаъолияти идоракунӣ, хоҷагидорӣ ва дигар намудани фаъолият ба муҳити зист, ҳаёт  ва саломатии аҳолӣ муайян менамояд.