Мулоқоти Қ.Қоимдодов бо донишҷӯёни тоҷик

Душанбе, 12.10.15. (АМИТ «Ховар»). – Президенти  Тоҷикистон Эмомалӣ  Раҳмон  ва  Ҳукумати  кишвар  ба масъалаи тарбияи  кадрҳо  дар  дохили  ҷумҳурӣ ва хориҷ  аз  он   таваҷҷуҳи  хосса  зоҳир  менамоянд,  гуфта  шуд  дар ҷараёни  мулоқоти  сафири  Тоҷикистон  дар  Беларус  Қозидавлат  Қоимдодов  бо  донишҷӯёни тоҷик, ки  дар Донишгоҳи  миллии  техникии  Беларус  таҳсил  мекунанд.
Қ.Қоимдодов аҳамияти ба  имзо  расонидани  Созишномаи  миёни  ҳукуматҳои Тоҷикистон  ва Беларус  дар  бораи ҳамкорӣ  дар бахши таҳсилоти  олӣ ва таҳсилот баъди хатми мактаби  олӣ ва санадҳои  дигари  марбут ба  тарбияи  кадрҳоро ёдрас  кард. 
Зикр  шуд, ки мувофиқи  паймони президентҳои  Тоҷикистону  Беларус соли  2012  дар  Донишгоҳи  техникии  Тоҷикистон  ба  номи  М.Осимӣ  факултаи муштараки муҳандисию техникии  донишгоҳи мазкур бо  Донишгоҳи  миллии техникии  Беларус  ба  кор  шурӯъ  кард. Соли  дуюм  аст, ки донишҷӯёни  факултаи муштараки Донишгоҳи техникии  Тоҷикистон  баъди  соли  дуюми таҳсил барои  давом  додани таҳсил  дар Донишгоҳи миллии техникии  Беларус  ба шаҳри  Минск  меоянд.
Сафири  Тоҷикистон аз  ҳодисаҳои ба  сафҳои ДИИШ ворид  шудани тоҷикистониён, ки  ҳангоми таҳсил  ва  фаъолият  дар  хориҷа  фирефтаи  «муҳоҷидон» мешаванд, изҳори  нигаронӣ  кард.
Сафир  дар  анҷоми  мулоқот  чунин  гуфт: «Ҳамеша  дар  хотир  дошта  бошед, ки  шумо барои таҳсил  ва  аз  худ  кардани  донишҳо ба  ин  ҷо омадаед».