Муроҷиати беш аз 74 ҳазор шаҳрванд ба Хадамоти муҳоҷират

Душанбе, 12.09.2015, (АМИТ «Ховар»).- Дар  9 моҳи соли 2015 ба Хадамоти муҳоҷират ва зерсохторҳои он 74 ҳазору 521 шаҳрванд бо дархост муроҷиат кардаанд, ки аз онҳо 69 ҳазору 015 нафар шифоҳӣ, 605  нафар хаттӣ ва 4901 нафари онҳо бо телефони боварӣ муроҷиат намуданд.
Ҳангоми санҷиши шаҳрвандон пеш аз  сафар ба Федератсияи Русия 29 ҳазору 877 шаҳрванди кишвар, ки дар рӯйхати мамнӯъшудагон дар махзани маълумоти Хадамоти муҳоҷират мавҷуд буданд, аз сафари бебарор баргардонида шуданд.
Тавре ки аз Хадамоти муҳоҷирати Вазорати меҳнат, муҳоҷират ва шуғли аҳолӣ ба АМИТ «Ховар» иттилоъ доданд, асосан муроҷиаткунандагон оид ба  масъалаҳои муайян намудани ҳолати беруншавӣ (ихроҷ) аз Федератсияи Русия, қонунгузории кишвари кордиҳанда, оид ба гирифтани патент дар Федератсияи Русия, барқарор намудани ҳуҷҷатҳои гумшуда, кумаку барои ба Ватан баргаштани хешовандон ва ғайра муроҷиат менамоянд.
Ҳоло рӯйхати шаҳрвандони сафарашон ба Федератсияи Русия манъгардида то ҳолати 1 октябри соли 2015 ба тамоми зерсохторҳои Хадамоти муҳоҷират дастрас  шудааст ва муҳоҷирони меҳнатӣ — шаҳрвандони Ҷумҳурии Тоҷикистон метавонанд дар ҷойи маҳалли зисти хеш пеш аз сафар ба Федератсияи Русия сафар намудан аз санҷиш гузаранд.