Радиои FM Ховар дар Хуҷанд фаъол гардид

Душанбе, 12.10.2015. (АМИТ «Ховар»).- Дирӯз Радиои FM Ховар дар мавҷи 91,5 FM дар шаҳрҳои Хуҷанд, Қайроққум, Чкалов  ва навоҳии  Бобоҷон  Ғафуров, Ҷаббор Расулов ва Спитамен фаъол гардид. Акнун сокинони шаҳри Хуҷанд ва навоҳии атрофи он  имкон доранд аз шунидани барномаҳои иттилоотиву маърифатӣ ва фароғатии ин радио бархурдор бошанд. 
То имрӯз мавҷи  радиои Ховар  фарогири  шаҳрҳои  Душанбе,  Қурғонтеппа, Кӯлоб ва  навоҳии атрофи ин шаҳрҳо  буд ва инак он дар шаҳри Хуҷанду навоҳии атрофи он танинандоз гардид. 
 «FM Ховар» — радиои  иттилоотӣ — мусиқӣ  буда,  дар  он  ахбор  мавқеи  хосса  дорад  ва  ҳамарӯза аз  соати  7:00  то  24:00 дар ҳар  ним  соат  ахбори  фаврию расмӣ, дақиқу муътамад ва гузоришҳои муҳим бо забонҳои  тоҷикию русӣ пахш  мешаванд. 
Радиои  «FM Ховар»  дар шаҳри Душанбе ва навоҳии атрофи он рӯи  мавҷи  101,5 FM  садо  медиҳад. Бояд  гуфт,  ин  радиоро  дар  тамоми  рӯи  олам аз тариқи  шабакаи  ҷаҳонии  интернет  дар  сомонаи  www.khovar.tj  шунидан  мумкин  аст,  ки  ин  иқдом  дар  таърихи  радиои  кишвар  аввалин маротиба  аз ҷониби «FM Ховар» ба  роҳ  монда  шудааст.  
Ба самъи шунавандагони азиз мерасонем, ки ба наздикӣ мавҷи Радиои Ховар дар шаҳри Хоруғ низ пахш хоҳад шуд.
Шиори Радиои мо-  бо Ховар бошу бехабар намон!