Сафорати Тоҷикистон дар Русия ҳодисаи фавти тифли панҷмоҳаи муҳоҷири кории тоҷикро таҳти назорат ва пайгирӣ қарор додааст

Душанбе, 17.10.2015. (АМИТ «Ховар»). — Сафири Тоҷикистон дар Федератсияи Русия Имомиддин Сатторов ба АМИТ «Ховар» иттилоъ дод,  ки  аз рӯзи 13-уми октябр  ин ҷониб  роҳбарият ва кормандони сафорати Тоҷикистон, консулгарии ифтихории мо дар Санкт-Петербург ва намояндагиҳои дигар вазорату идораҳои масъули Тоҷикистон дар Русия ҳодисаи фавтидани тифли панҷмоҳаи муҳоҷири кориро таҳти назорат ва пайгирӣ қарор додаанд.  
Ҳоло риояи ҳолатҳои ҳуқуқии ҳодисаи аз модар ҷудо кардани тифли ширхор ва ба  ҳалокат расидани кӯдак  аз тарафи мақомоти дахлдори Русия мавриди санҷиш қарор дорад. 
Сафири Тоҷикистон дар Русия  изҳори умед намуд, ки тафтиши ин қазия мунсифона ва бо риояи талаботи қонун ҷараён мегирад.  
Хотиррасон мекунем, ки Сафорати Ҷумҳурии Тоҷикистон дар Федератсияи Русия ба Вазорати корҳои хориҷии ин кишвар оид ба ҳодисаи фавтидани тифли 5 моҳаи оилаи муҳоҷири корӣ нотаи эътирозӣ ирсол намуд. 
Тавре ки иттилоъ дода мешавад, 13-уми октябри соли равон кормандони Раёсати ХФМ  (Хадамоти федеролии муҳоҷират)-и Федератсияи Русия зану шавҳар — шаҳрвандони Тоҷикистон Далер Назаров ва Заррина Юнусоваро бо сабаби риоя накардани талаботи қоидаҳои будубоши муҳоҷирони корӣ боздошт карда, ба бинои шуъбаи 1-уми корҳои дохилии ноҳияи Адмиралтейски шаҳри Санкт-Петербург интиқол медиҳанд.
Ҳамроҳ бо ин оилаи ҷавон фарзанди онҳо Назаров Умаралии 5 моҳа низ буд. Кормандони ХФМ ФР бе ҳуҷҷатгузории зарурӣ шаҳрвандони Тоҷикистон Назаров Далер ва Юнусова Зарринаро дар боздоштгоҳи муваққатӣ нигоҳ дошта, фарзанди панҷмоҳаи онҳоро, ки ба нигоҳубин ниёз дошт, аз модар ҷудо мекунанд. 
Худи ҳамон рӯз ин шаҳрвандони Тоҷикистонро ба идораи суд, барои баррасии «вайрон шудани қоидаҳои мавҷудаи муҳоҷирати меҳнатӣ» мебаранд. Бо гузашти зиёда аз панҷ соат суд ҳукм содир мекунад, ки ин шаҳрвандони Тоҷикистон аз ҳисоби худашон аз ҳудуди маъмурӣ хориҷ гарданд.
Пас аз ин Юнусова Заррина барои гирифтани тифли худ ба шуъбаи корҳои дохилӣ, ки он ҷо кӯдаки панҷмоҳаашро аз дасташ гирифта буданд, меравад. Аммо дар шуъбаи корҳои дохилӣ ба ӯ дар баргардонида додани кӯдак мусоидат намекунанд ва дар мавриди он ки кӯдак дар куҷо қарор дорад, маълумот низ намедиҳанд. Танҳо рӯзи дигар аз идораи пулис ба Юнусова Заррина занг зада, хабар медиҳанд, ки тифлаш фавтидааст.