Айнӣ: Номгузории муассисаи таълимӣ ба номи корманди ВКД Алибой Идиев

Душанбе, 10.11.2015. (АМИТ «Ховар).-8-уми ноябр дар мактаби таҳсилоти умумии №57-и ноҳияи Айнӣ маросими номгузории ин муассисаи таълимӣ ба номи корманди Дастаи таъйиноти махсуси милитсияи ВКД, майори милитсия Алибой Идиев сурат гирифт. 
Дар ҷамъомад муовини вазири корҳои дохилӣ  Умарзода Икром, раиси ноҳияи Айнӣ Неъматулло Раҳматуллозода, намояндагони шуъбаи маориф ва пайвандони шодравон Алибой Идиев иштирок карданд.
Умарзода Икром аз саҳми кормандони мақомоти корҳои дохилӣ дар таҳкими суботу оромӣ ва мубориза бо ҷинояткорӣ ибрози назар карда, аз корнамоии корманди Дастаи таъйиноти махсуси милитсияи ВКД, майори милитсия Алибой Идиев, ки дар ҳодисаҳои моҳи сентябр ҳангоми иштирок дар муқовимати мусаллаҳона бар зидди гурӯҳҳои муташаккили ҷинояткор ҳалок гардид.
Раиси ноҳия  Неъматулло Раҳматуллозода зикр намуд, ки мо ҳаргиз Алибой Идиевро, ки барои ҳифзи Ватан ва давлату миллат ҷон нисор намуд, фаромӯш намесозем.
Дар чорабинӣ омӯзгорону ҳамсинфон ва дӯстону наздикони Алибой Идиев хотираҳои худро аз рӯзгори ӯ, ки замоне дар ин муассисаи таълимӣ таҳсил карда буд, ёдовар шуданд.
Дар ин бора ба АМИТ «Ховар» сардори маркази матбуоти ВКД Ҷалолиддини Садриддин хабар дод.