Аз муоинаи тиббӣ гузаштани арусу домод ҳатмӣ хоҳад шуд

Душанбе, 27.11.2015. (АМИТ «Ховар»). — Тибқи тағйиру иловаҳое, ки имрӯз ба Кодекси оилаи Ҷумҳурии Тоҷикистон дар маҷлиси Ҳукумати Ҷумҳурии Тоҷикистон маъқул дониста шуда, ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод гардид, дар ҳолати қабул шуданаш минбаъд арусу домод пеш аз хонадоршавӣ бояд аз муоинаи ҳатмии тиббӣ гузаранд.
Ҳадаф аз ин тадбир, ки бо пешниҳоди Сарвари давлат Эмомалӣ Раҳмон дар асоси арзу шикоятҳои мардум андешида шудааст, пешгирӣ аз сирояти ноогоҳонаи бемориҳои вазнини гузаранда, аз ҷумла вируси норасоии масунияти бадан (СПИД), ба ҷавонони навхонадор аз ҳамдигар мебошад. 
Чунонки зикр гардид, ҳаққи ба инобат гирифтан ё нагирифтани натиҷаи муоинаи тиббӣ ҳангоми хонадоршавӣ ба худи ҷавонон вогузор мегардад, яъне ин ташхис хислати тавсиявӣ дорад.