Дар Душанбе ҳамоиши якуми донишгоҳҳои славянӣ баргузор мешавад

Душанбе, 10.11.15. (АМИТ «Ховар»). — 17  ноябр  дар  шаҳри  Душанбе  ҳамоиши  якуми донишгоҳҳои  славянӣ  баргузор  мегардад, ки дар  кори он  ректорони донишгоҳҳои  славянии Тоҷикистон,  Озарбойҷон,  Арманистон,  Беларус,  Молдова ва  Қирғизистон  иштирок  менамоянд.
Тавре  ки   ректори Донишгоҳи  славянии  Русияю  Тоҷикистон  Нуралӣ  Солеҳов ба  мухбири  АМИТ «Ховар»  хабар  дод,  ба ҳамоиш  намояндагони Донишгоҳи  политехникии  Томск  ва  намояндагиҳои донишкадаҳои олии  Русия  дар  шаҳри  Душанбе  низ  даъват  шудаанд.
Чорабинии мазкур бо  дастгирии Бунёди  байнидавлатии  ҳамкории башардӯстона роҳандозӣ  мешавад.
Аз  рӯи  натиҷаи  ҳамоиш Ассотсиатсияи  донишгоҳҳои  славянӣ  таъсис  ёфта, ёддошти  дахлдор қабул   мешавад. 
Ҷаласаҳои навбатии ҳамоиш   ҳар  сол  дар   заминаи  донишкадаҳои  олии  иштирокдори  лоиҳа  доир  мегарданд. 
Барномаи   фарҳангӣ  низ  ба  нақша  гирифта шудааст,  ки  дар  ҳошияи  он  дастаи «Славяне» — и Донишгоҳи  славянии Русияю  Тоҷикистон ҳунарнамоӣ  мекунад.