Дар Фаронса сарони кишварҳои ҷаҳон масъалаи тағйирёбии иқлимро баррасӣ мекунанд

Душанбе, 30.11.2015 (АМИТ «Ховар»). -Бо мақсади таъмини амният ҳукуматдорони Фаронса баргузор кардани намоиш ва роҳпаймоии аъзои созмону ташкилоти ҳифзи муҳити зистро дар саҳни «Майдони Республика» манъ карданд.
Ёдовар мешавем, ки аз 29-уми ноябр то 11-уми декабри соли равон дар пойтахти Фаронса- шаҳри Париж Конфронси 21-уми СММ оид ба тағйирёбии иқлим баргузор мешавад. Дар кори конфронс сарони 150 давлату ҳукуматҳои ҷаҳон, аз ҷумла роҳбарони ИМА, Федератсияи Русия, Олмон, Британияи Кабир, Тоҷикистон, Туркия, Юнон ва дигар кишварҳо иштирок доранд. Дар ҷараёни Конфронси СММ мушкилоти кам намудани партовҳои газӣ, ки боиси тағйирёбии иқлими сайёра шудааст, мавриди муҳокима қарор дода мешавад. Дар назар дошта шудааст, ки дар доираи конфронс созишномаи байналмилалӣ оид ба нигоҳ доштани баландшавии ҳарорати миёнаи сайёра дар сатҳи камтар аз 2 дараҷаи Селсия ба имзо расад. Ҳамчунин ба андешаи коршиносон, сарони кишварҳои ҷаҳон дар ҳошияи конфронси Париж масъалаҳои геосиёсӣ ва вазъи мураккаби Шарқи Наздик, пайдо кардани роҳҳои бартарафсозии оқибатҳои ногувори хунрезиҳо дар кишварҳои Ироқу Сурияро муҳокима мекунанд    
Президенти Ҷумҳурии Тоҷикистон Эмомалӣ Раҳмон барои иштирок дар кори  конфронс 29-уми ноябр ба Париж сафар кард ва дар рӯзи нахустини конфронс бо ноиби аввали ширкати «Тотал» Майкл Боррел ва ноиби раиси ширкати «Аэробус» Силвер Дэлонэ мулоқоти судманд баргузор намуд.