Давраи омӯзиши минтақавӣ оид ба нобуд кардани маводи тарканда дар Тоҷикистон

Душанбе, 10.11.2015 (АМИТ «Ховар»).- Сафорати ИМА дар шаҳри  Душанбе дар ҳамкорӣ бо Созмони амният ва ҳамкорӣ дар Аврупо (САҲА) давраи омӯзишӣ оид ба нобуд кардани моддаҳои таркандаро барои 32 мутахассис аз минтақаи Осиёи Марказӣ барои тоза кардан аз минаҳо, ки дар Душанбе аз 26 октябр то 5 ноябр сурат гирифт, маблағгузорӣ карданд.
 Давраи омӯзишии мазкур, ки охирин давр дар силсилаи ҳафт чорабинии марҳилавӣ мебошад, ба мубориза бо дастгоҳи таркандаи дастисохт ва тайёр намудани иштирокдорон ба сифати мураббиёни дорои шаҳодатнома барои маҳви маводи тарканда тамаркуз шудааст. Иштирокдорони давраи омӯзишӣ намояндагон аз Тоҷикистон, Афғонистон, Қазоқистон ва Қирғизистон буданд. Иҷрокунандаи вазифаи муовини роҳбари Сафорати ИМА Майкл Мансини дар маросими хатми омӯзиш аз тарафи мутахассисони Тоҷикистону Афғонистон иқтидори ҳамкории минтақавиро, ки дар мисоли давраи омӯзишии мазкур дида шуд, ситоиш кард. Ҳамчунин ӯ таъқид дошт, ки баланд бардоштани иқтидор барои  беҳавф, тоза ва нобуд кардани минаҳо, бозмондаҳои таркандаи ҷанг ва моддаҳои таркандаи таҳлукаовар ва амнияту суботи минтақавӣ судбахш хоҳад шуд. Сафорати ИМА дар Душанбе аз соли 2013 инҷониб дар раванди ин талошҳо бо САҲА ҳамкорӣ менамояд.