«Девон»-и Нақибхон Туғрали Аҳрорӣ аз чоп баромад

Душанбе, 17.11.2015. (АМИТ «Ховар») — Нашриёти «Хуросон — Медиа»-и шаҳри Хуҷанд «Девон»-и нисбатан мукаммали ашъори шоири маъруф ва суханвари мумтози нимаи дувуми асри XIX ва ибтидои асри ХХ Нақибхон Туғрали Аҳрориро бо тасҳеҳ, тавзеҳот ва пешгуфтори шоир ва муҳаққиқи тоҷик Нуралӣ Нурзод бо хати форсӣ ва сирилик рўйи чоп овард. Девон бар асоси нусхаи чопи сангии соли 1916 дар Бухоро интишорёфта ва муқоиса бо нашрҳои охир тасҳеҳ гардида, 331 ғазал, 11 қасида ба шумули “Фироқнома” (дар ҷавоби “Фироқнома” — Анварӣ ва Хоҷуи Кирмонӣ), 12 мухаммас, 5 мусаддас, 1 мусамман, “Соқинома”, “Наврўзнома”, чанд маснавии кўтоҳ бо номи «Арза”,  маснавии нотамоми “Лайлӣ ва Маҷнун” ва 9 рубоии шоирро дар бар гирифтааст.