«Ҷойгоҳи Туғрали Аҳрорӣ дар адабиёти тоҷик»-конфронси илмии байналмилалӣ

Душанбе, 11.11.2015. (АМИТ «Ховар»).- 10-уми ноябри соли равон дар Академияи илмҳои Ҷумҳурии Тоҷикистон конфронси илмии байналмилалӣ таҳти унвони «Ҷойгоҳи  Туғрали Аҳрорӣ дар адабиёти тоҷик» бахшида ба 150-солагии шоири маъруф Нақибхон Туғрали Аҳрорӣ баргузор шуд. Дар конфронс донишмандон ва муҳаққиқони ашъори Туғрал аз Тоҷикистон ва хориҷи  кишвар иштирок намуданд. 
Дар конфронс президенти  Академияи илмҳои Ҷумҳурии Тоҷикистон, академик Фарҳод Раҳимӣ, доктор Иброҳим Худоёр — раиси Ройзании фарҳангии Ҷумҳурии исломии Эрон дар Ҷумҳурии Тоҷикистон, ноиби президенти АИ ҶТ, академик Кароматулло Олимов, доктори илмҳои филологӣ, директори Институти забон, адабиёт, шарқшиносӣ ва мероси хаттии ба номи Абӯабдуллоҳ Рӯдакӣ Сахидод Раҳматуллозода ва номзади илмҳои филологӣ Саидумар Султонов гузоришҳои  илмӣ карданд. 
Кори конфронс дар се бахш: «Ҷойгоҳи Нақибхон Туғрали Аҳрорӣ дар таърихи адабиёти тоҷик», «Нақибхон Туғрали Аҳрорӣ  ва афкори фалсафӣ  ва  иҷтимоии  замони  ӯ» ва «Забон ва услуби  ашъори Нақибхон Туғрали Аҳрорӣ» идома ёфта, муҳаққиқон ва олимони шинохта ҳаёт ва фаъолияти шоири маъруф Нақибхон Туғрали Аҳрориро арзёбӣ намуданд.  
Иштирокдорони конфронс баёния қабул карданд, ки тибқи он  таҳқиқоти ашъори Нақибхони Туғрал идома меёбад.
Ёдовар мешавем, ки Нақибхон Туғрали Аҳрорӣ шоири маъруф ва барҷастаи охири асри 19 ва ибтидои асри 20 мебошад.
 Дар ин бора корманди хадамоти матбуотии Академияи илмҳои Ҷумҳурии Тоҷикистон Шервони Умриддин хабар дод.