Парчам ифтихори давлату миллат аст

Душанбе, 24. 11. 2015. (АМИТ «Ховар»).- Дар Донишкадаи давлатии  санъати тасвирӣ ва дизайни Тоҷикистон бахшида ба  Рӯзи парчами давлатӣ  мизи мудаввар баргузор гардид. Ректори  донишкада Ғанизода Ҷамшед Шуҷоат ҷамъомадагонро бо Рӯзи парчам табрик намуда,  гуфт, ки парчами давлатӣ аз зумраи муқаддасотест, ки фарзандони Ватан бо он савганд ёд мекунанд ва дар назди он сар фуруд меоранд. 
“Шарафу эътибори парчам  дар дохилу беруни кишвар ҳамчун муқаддасоти бузурги миллӣ ҳимояву пуштибонӣ гашта, таҳқири парчам таҳқири гузаштаву имрўза ва ояндаи ҳар як халқ ва ифтихори давлату давлатдории он маҳсуб мешавад”,-зикр намуд ректори донишкада.
Ноиби  ректор оид ба илм ва корҳои эҷодӣ Ҷамила Худойбердиева, аз ҷумла баён дошт, ки Парчам муқаддасотест, ки баёнгари таъриху фарҳанги ҳар миллат буда, гузаштаву имрўза ва ояндаро бо ҳам мепайвандад.