«Парчамат тобанда бодо, Тоҷикистони азиз!»-ҳамоиш дар Ёвон

Ёвон, 18.11.2015. (АМИТ «Ховар»).-Дар ноҳияи Ёвон дар арафаи  ҷашни Парчами миллии Ҷумҳурии  Тоҷикистон бунгоҳи тиббии  «Оби шифо»-ро дар  ҷамоати деҳоти Норин бо иштироки раиси ноҳия Амирбеки Темур ва меҳмонону  сокинони ҷамоати  мазкур  ба истифода  медиҳанд. Бунгоҳи  мазкур аз ҳисоби саҳми маҳал сохта шуда, бо дастгирии раиси ноҳия бо таҷҳизоти замонавӣ  таъмин гардидааст.
Ба ифтихори рӯзи Парчами миллии Ҷумҳурии  Тоҷикистон дар ноҳияи Ёвон  насб кардани  Парчами давлатӣ дар ҳамаи мақомот  ва иншооти  давлатӣию биноҳои  баландошёнаю  идораву муассисаҳо, кӯчаву  хиёбонҳо ва нақлиёти ҷамъиятӣ идома дорад.
Инчунин дар маркази ноҳия, ҷамоатҳои шаҳраку деҳот ва ташкилоту  муассисаҳо  бо иштироки фаъолон, сокинону  меҳмонон ва ҷавонон баргузор намудани  чорабиниҳои  идона,  мусобиқаҳои варзишӣ, мизҳои мудаввар, конфронсҳо таҳти унвони » Парчамат парафшон бод, Тоҷикистон » бахшида ба рӯзи Парчами давлатӣ ҷараён доранд. 
Рӯзи 24 ноябри соли 2015  бо иштироки 1500 нафар  ҷавонону  донишҷӯён  зери шиори » Парчамат тобанда бодо, Тоҷикистони азиз!» маҷлиси тантанавию роҳпаймоӣ аз назди  муҷассамаи » Модар» то Кохи фарҳанги маркази ноҳия баргузор мегардад.