Талаботи рӯзафзуни аҳолии Кӯлоб ба неруи барқ

Кӯлоб,  9.11.2015. (АМИТ  «Ховар») — Кормандони шабакаҳои барқии шаҳри Кӯлоб омодагии хуб дида, таҷҳизоти зарурӣ, қисмҳои эҳтиётии трансформаторҳо, равғани он ва ноқилҳои барқию пояҳои оҳану бетонӣ захира кардаанд. 
Ба  гуфти  Ҷумъахон Раҷабов, сардори Шабакаҳои барқии шаҳри Кӯлоб мушкилоти онҳо напардохтани ҳаққи истифодаи барқ аз ҷониби ташкилоту корхонаҳо ва аҳолӣ мебошад. Моҳ ба моҳ афзоиши қарзи ҳаққи истифодаи барқ роҳбарияти шабакаҳои барқиро ба ташвиш овардааст ва аз ин рӯ барои ҳалли мушкилот истифодабарандагонро бо  ҳисобкунакҳои кортӣ пайваст намуда истодаанд. 
Солҳои қаблӣ трансформаторҳо аз кор мебаромаданд ва ҳафтаҳо аҳолӣ бе барқ мемонд. Ҳоло дар назди шабакаҳои барқӣ коргоҳи таъмири трансформаторҳо фаъол гаштааст, кти онҳоро оҷилан таъмир менамоянд. Роҳбарияти шабакаҳои барқӣ коргоҳро бо таҷҳизоти зарурӣ ва қисмҳои трансформаторҳо таъмин кардааст. Кормандони шуъбаи умури фаврӣ низ корро ба таври шабонарӯзӣ ба роҳ монда, вобаста ба муроҷиати шаҳрвандон оид ба рух додани садамаҳо гурӯҳҳои таъмириро сафарбар мекунанд. Назорати фаъолияти зеристгоҳҳо ва шабакаҳои барқӣ ба дӯши шуъбаи мазкур мебошад. Вобаста ба тараққиёти соҳаҳои гуногуни хоҷагии халқи мамлакат талабот ба неруи барқ ҳамарӯза афзоиш меёбад.