В. Путин сарнишини ҳалокшудаи СУ-24-ро бо унвони Қаҳрамони Русия сарфароз гардонид

Душанбе, 25.11.2015. (АМИТ «Ховар») .- Сарнишини ҳалокшудаи ҳавопаймои СУ-24, ки ҳавопаймои Туркия онро 24-уми ноябр дар Сурия сарозер кард, пас аз вафот бо унвони Қаҳрамони Русия сарфароз гардонида шуд. Дар ин бора фармони Президенти ФР Владимир Путин ба имзо расид.
«Барои қаҳрамонӣ, ҷасорат ва шуҷоате, ки подполковник Пешков Олег Анатолйевич ҳангоми иҷрои вазифаи ҳарбӣ нишон дод, бо унвони Қаҳрамони Федератсияи Русия (пас аз вафот) сарфароз гардонида шуд»,- зикр шудааст дар фармоне, ки хадамоти матбуоти Кремл интишор кардааст.
Ҳамчунин «Барои нишон додани ҷасорат, шуҷоат ва фидокорӣ ҳангоми иҷрои вазифаи ҳарбӣ» капитан Константин Мурахтин (штурмани ҳавопаймои сарозершудаи СУ-24) ва маллоҳ Александр Позинич пас аз вафот (аскари пиёдаи баҳрӣ, иштирокдори амалиёти ҷустуҷӯӣ ва наҷотдиҳӣ) бо ордени «Ҷасорат» мукофотонида шуданд..
Чанде қабл иттилоъ дода шуд, ки штурмани ҳавопаймои сарозершудаи СУ-24-и Русия зимни амалиёти неруҳои таъйиноти махсуси Сурия ва Русия пайдо гардида, шаби 25-уми ноябр ба пойгоҳи ҳавоии Хмеймим оварда шуд. Бино ба баъзе маълумот, саринишин зимни фуруд омадан бо парашут аз ҷониби силоҳбадастон кушта шудааст.