Вохӯрии Р. Раҳимзода бо муҳоҷирони меҳнатӣ дар Федератсияи Русия

Душанбе, 25.11.2015. (АМИТ «Ховар»).- 24-уми ноябри соли равон, вазири корҳои дохилӣ Раҳимзода Рамазон Ҳамро дар доираи сафари корӣ ба Федератсияи Русия дар шаҳри Маскав бо раисони диаспораҳои тоҷик, муҳоҷирони меҳнатӣ ва ҳамватанони бурунмарзии шаҳри Маскав, Твер, Краснодар, Перм, Адигея ва дигар минтақаю вилоятҳои ин кишвар вохӯрӣ анҷом дод.
Зимни вохӯрӣ масъалаҳои ҳифзи ҳуқуқҳои муҳоҷирони меҳнатӣ, вазъи ҷинояткорӣ, пешгирии шомилшавии шаҳрвандони Ҷумҳурии Тоҷикистон ба ҳизбу ҳаракатҳо ва гурӯҳҳои ғайриқонунии экстремистию террористӣ ва дигар мавзӯъҳои мубрами рӯз мавриди баррасӣ қарор гирифтанд.
Дар вохурӣ вазири корҳои дохилӣ таъкид намуд, ки ҳамеша омодааст, дар ҳамкорӣ бо ҳамватанони бурунмарзӣ барои  рафъи мушкилиҳо мусоидат намояд.
Раисони диаспораҳо ва ҷамъиятҳои тоҷикони Федератсияи Русия дар навбати худ изҳор доштанд, ки мо — тоҷикони муқими Русия барои он, ин ҷо заҳмат мекашем, ки падару модар  ва зану фарзандонамон дар Ватан зиндагии хуб дошта бошанд. Онҳо таъкид карданд, ки воқеан талошу кӯшиш ва заҳматҳои Сарвари давлат дар роҳи расидан ба мақсадҳои олӣ хеле назаррасанд. Гарчанде аз Ватан дурем, вале ободию шукуфоии диёри азизамонро дидаву шунида, аз ин шахсияти маъруф ва шинохта, Роҳбари давлату миллати соҳибтамаддун ифтихор менамоем, ки дар чанд соли охир Тоҷикистон хеле ободу зебо шуда, ба пешравиҳои чашмрас ноил гардидааст. Мо  омода ҳастем барои инкишоф ва боло бурдани нуфузи Тоҷикистони азиз саҳми худро гузорем, изҳор намуданд ҳамватанони бурунмарзӣ.