37 нафар бар асари ҳамлаи Толибон ба фурудгоҳи Қандаҳор ҳалок гашт

Душанбе, 10.12.2015 (АМИТ «Ховар»). — Дар натиҷаи ҳамлаи ҷангиёни ҳаракати ифротии «Толибон» ба фурудгоҳи Қандаҳори Афғонистон тақрибан 37 сокини маҳаллӣ ҳалок шуда, 18 тани дигар ҷароҳат бардоштанд, иттилоъ медиҳад манбаъ аз мақомоти қудратии Афғонистон. 
Бино ба иттилои агентии хабарии «Синхуа», дар ҷараёни тирпаронӣ 8 ходими ҳарбии Афғонистон ва 9 ҷангии «Толибон» кушта шуданд.
Бегоҳии дирӯз гурӯҳи мусаллаҳи ҷангиёни «Толибон» ба фурудгоҳи Қандаҳор ва ба маҳаллаҳои аҳолинишини атроф, ки он ҷо оилаҳои ходимони ҳарбӣ зиндагӣ мекунанд, ҳамла кард. 
Тирпаронӣ миёни неруҳои давлатӣ ва «Толибон» қариб 20 соат давом кард.
Баъдан намояндаи ҳаракати «Толибон» ба ВАО изҳор дошт, ки ин ҳамла яке аз ҳамлаҳои банақшагирифтаи «Толибон» мебошад.