Ҳамлаи худкуш боиси ҳалокати сокинони осоишта гардид

Душанбе, 29.12.15. (АМИТ «Ховар»). — Назар  ба  хабари  намояндагони Вазорати тандурустии Афғонистон, бар  асари  ҳамлаи  шахси худкуш, ки  субҳи  имрӯз  дар  наздикии  фурудгоҳи  байналмилалии  Кобул  сурат  гирифт,  камаш  31  нафар  осеб  дид. 
Ёдовар  мешавем, ки  ин  ҳодиса  тахминан  соати 8 пагоҳӣ  дар мобайни роҳи серодам  рух  дод. Силоҳбадасти  худкуш, ки  иҷрокунандаи  ҳамла  буд,  дар  автомобили  минадор  ҳаракат  мекард. 
Пештар  аз  ҳалокати  як  сокини  осоишта  ва  захмӣ шудани  13  нафари  дигар   хабар  дода шуда буд, вале  баъдан  маълум  шуд, ки  теъдоди  осебдидагон  на  камтар  аз  32  нафар  будааст. Манбаъҳои  вазорати  тандурустӣ  хабар  медиҳанд, ки  ҳамаи  осебдидагон  аз ҷумлаи  сокинони  осоиштаанд. 
Назар  ба  иттилои  шабакаи   телевизионии «Тулӯъ»,  шоҳидон  хабар  медиҳанд, ки  бар  асари таркиш аз  як  нафар  бештар  ба  ҳалокат  расидааст, вале  омори  аниқшуда  дар  мавриди  теъдоди  ҳалокшудагон  то  ҳол  расман  дарҷ  нашудааст. 
Ёдовар  мешавем, ки  масъулияти   ҳамлаи  худкушро   намояндагони  «Толибон»  ба  дӯши  худ  гирифта, изҳор  доштаанд, ки ба хидматчиёни  ҳарбии  хориҷӣ, ки   дар  ин  роҳ   ҳаракат  мекарданд,  талафот  расонидаанд.