Ҳаракати аввалин қатораи контейнерии озмоишӣ дар хатсайри «Чин – Тоҷикистон» ба самти Душанбе оғоз гардид

ДУШАНБЕ, 23.01.2026 /АМИТ «Ховар»/. Ширкати «UTK International Logistics Co. Ltd» 17 феврал аввалин қатораи контейнерии озмоиширо дар хатсайри Чин—Тоҷикистон ба ҳаракат даровард, иттилоъ медиҳад АМИТ «Ховар» бо истинод ба Вазорати нақлиёти Тоҷикистон.

Корхонаи муштараки «UTK International Logistics Co. Ltd», ки дар Чин бо иштироки ҶДММ «Узтемирйулконтейнер» таъсис ёфтааст, аввалин қатораи контейнерии озмоиширо муваффақона аз Чин ба Ҷумҳурии Тоҷикистон фиристод. Лоиҳаи мазкур дар доираи татбиқи созишномаҳо оид ба таҳкими ҳамкории минтақавӣ ва рушди робитаҳо, ки соли 2025 дар мулоқоти сарони давлатҳои Тоҷикистон, Қирғизистон ва Узбекистон  ба имзо расидаанд, амалӣ гардид.

Қатора аз 8 контейнери чилфутӣ (1 фут баробари 0,3 метр) иборат аст, ки ба онҳо молҳои мавриди ниёзи мардум ва техникаи сохтмонӣ бор карда шудаанд. Қатораи вагонҳо аз истгоҳи Ланчжоу, музофоти Гансуи Чин ҳаракат намуда, тавассути  хатсайри «Чин –  Қирғизистон – Узбекистон – Тоҷикистон» то ба истгоҳи роҳи оҳани  «Душанбе-2»-и Тоҷикистон роҳ мепаймояд. Дарозии умумии хатсайр зиёда аз 3 500 километрро ташкил дода, вақти интиқоли бор 18-20 рӯзро дар бар мегирад.

Бо дастгирии ҶДММ «Узбекистон темир юллари»  («Роҳҳои оҳани Узбекистон») оид ба ташаббусҳои бахши логистикӣ дар ин хатсайри мултимодалӣ имтиёзҳои тарифӣ муқаррар карда шудаанд. Татбиқи ин лоиҳаи озмоишӣ ба омодагии амалии ширкат барои ташкили интиқоли контейнерҳои устувор ва мунтазам дар самти «Чин – Осиёи Марказӣ» нигаронида шудааст.

АКС: Вазорати нақлиёти Тоҷикистон